කොවිඩ් එන්නත්කරණයට පූර්ණව ලක්ව සිටින්නන් ඇතුලුව ශ්‍රී ලංකාවට පැමිණෙන සියල්ලන් වහාම ක්‍රියාත්මක වන පරිදි අද සිට දින 14 ක නිරෝධායනයට යොමු කිරීම අනිවාර්ය කර තිබෙනවා.
සෞඛ්‍ය සේවා අධ්‍යක්ෂ ජනරාල්වරයා විසින් නිකුත් කර ඇති නියමයක දැක්වෙන්නේ විදෙස්ගතව සිට පැමිණෙන සියලූ ශ්‍රී ලාංකිකයින්, ද්විත්ව පුරවැසියන්, සංචාරකයින්, විදේශිකයන් මෙන්ම රාජ්‍ය තාන්ත්‍රික නිලධාරීන් ඊට යටත් වන බවයි.
වයස අවුරුදු 12 ට වැඩි සියල්ලන් රටට පැමිණි පළමු දිනයේදී පී සී ආර් පරීක්ෂණයකට යොමුවීම අනිවාර්ය වනවා.
එමෙන්ම දින 11 ත් 14 ත් අතර කාලයේදී ඔවුන් දෙවන පී සී ආර් පරීක්ෂණයට යොමු විය යුතු බවයි සෞඛ්‍ය සේවා අධ්‍යක්ෂ ජනරාල්වරයා නිකුත් කල නිවේදනයේ දක්වා ඇත්තේ.
එහිදී සෘණාත්මක පී සී ආර් පරීක්ෂණයක් ප්‍රථිඵලයක් ලැබුණහොත් පමණක් ඔවුන් නිරෝධායනයෙන් මුදා හැරිය යුතු බවයි එහි සඳහන් වන්නේ.
මෙලෙස නිරෝධායනයට ලක්වන්නන් කොවිඩ් ආසාධිතයන්ගේ ආශ්‍රිතයන් යැයි හඳුනාගත හොත් ඔවුන්ගේ නිරෝධායන කාල සීමාව දීර්ඝ කල හැකියි.
මෙම නියමයන් ලබන 31 වනදා දක්වා බලාත්මක වන බවයි සෞඛ්‍ය සේවා අධ්‍යක්ෂ ජනරාල්වරයා විසින් නිකුත් කර ඇති නිවේදනයේ සඳහන් වන්නේ.
