
ප්රධාන ඔස්ට්රේලියානු බැංකුවක් වන මැක්වරි (Macquarie) තම ගනුදෙනුකරුවන්ට ඩිජිටල් ගෙවීම් පද්ධති වෙත මාරු වීමට දින පහක කාලයක් ලබාදී තිබෙනවා.
බැංකුව පසුගිය වසරේ ප්රකාශ කළේ ගනුදෙනුකරුවන් සඳහා මුදල්, චෙක්පත් සහ දුරකථන බිල්පත් ගෙවීම් ක්රමානුකූලව නතර කරන අතර සම්පූර්ණයෙන්ම මුදල් රහිත වූ පළමු බැංකුව බවට තමන් පත්වන බවයි.
මැයි 20 වනදා සිදු කෙරෙන වෙනස්කම් යටතේ පාරිභෝගිකයින්ට තවදුරටත් කවුන්ටර අසල කල් ගත කිරීම, චෙක්පත් තැන්පත් කිරීම හෝ එකතු කිරීම මෙන්ම කාර්යාලවල නව චෙක් පොත් ඇණවුම් කිරීමට අවශ්ය නොවන බව සඳහන්.

මැක්වරි ට්රාන්සැක්ෂන් (Macquarie Transaction) ගිණුමක් හෝ මැක්වරි ඩෙබිට් මාස්ටර්කාඩ් (Macquarie Debit Mastercard) සහිත ඔෆ්සෙට් ගිණුමක් ඇති පාරිභෝගිකයින්ට ඕස්ට්රේලියාව පුරා ATM යන්ත්රවලින් ගාස්තු රහිතව මුදල් ලබා ගැනීමට හැකි වනවා.
මෙම ක්රමවේදය අනුව නොවැම්බර් 1 වැනිදා සිට ඔස්ට්රේලියාවේ පස්වන විශාලතම බැංකුව සම්පූර්ණයෙන්ම මුදල් රහිත බවට පත් වනු ඇති බවයි පැවසෙන්නේ.

ඩිජිටල් බැංකුවක් ලෙස, 2024 නොවැම්බර් වන විට ආරක්ෂිත, වේගවත් සහ පහසු බැංකු මාර්ගයක් ලෙස සම්පූර්ණයෙන්ම ඩිජිටල් ගෙවීම් වෙත සංක්රමණය වීමට කැපවී සිටින බවයි මැක්වරි බැංකුවේ ප්රකාශකයෙක් සඳහන් කළේ.
ගනුදෙනුකරුවන්ගෙන් බහුතරයක් දැනටමත් ඩිජිටල් බැංකු ක්රමයට අනුගත වී ඇති අතර සියයට 1 කට වඩා අඩු අනෙකුත් ගනුදෙනුකරුවන් ඩිජිටල් ගෙවීම් ක්රම වෙත ප්රවේශය කිරීම සඳහා සහාය වීමට කටයුතු කරමින් සිටින බව ද ඔවුන් ප්රකාශ කර තිබෙනවා.
කෙසේවෙතත් මැක්වරි බැංකුවේ මෙම පියවර ඩිජිටල් නොවන සේවා මත වැඩිපුරම යැපෙන වැඩිහිටියන් වැනි ඇතැම් විශේෂිත පුද්ගලයින්ට බලපාන ආකාරය පිළිබඳ විවේචනයට ලක්ව ඇතැයි ද සඳහන්.