නිෂ්පාදන දෝෂ කිහිපයක් හේතුවෙන් ඔස්ට්‍රේලියාවේ සුඛෝපභෝගී SUV මෝටර් රථ කිහිපයක් නැවත කැඳවීමට ඇස්ටන් මාර්ටින් සමාගම් බලධාරීන් පියවර ගෙන තිබෙනවා.
සුඛෝපභෝගී මෝටර් රථ නිෂ්පාදකයෙකු වන ඇස්ටන් මාර්ටින් ලැගොන්ඩා විසින් DBX යන මෝටර් රථ කාණ්ඩය මෙලෙස කැඳවා ඇති බවයි පැවසෙන්නේ.
මෙම වාහන ධාවනය අතරතුර ගිනි ගැනීමේ අවදානමක් පවතින බවට අනාවරණය වීමත් සමග අදාළ වාහන යළි කැඳවීමට පියවර ගෙන තිබෙනවා.
2022 සහ 2023 වසර අතර නිෂ්පාදනය කරන ලද වාහන 59ක් මෙලෙස බලපෑමට ලක්ව ඇති අතර ඔයිල් කූලර්හි ගිනි ගැනීම් තත්වයක් ඊට හේතුවී ඇති බවයි වාර්තා වන්නේ.
මෙමගින් වාහනවල එන්ජිම ඇනහිටීමට හෝ තෙල් කාන්දු වීමට හේතු විය හැකි අතර රිය පැදවීමේදී එන්ජිම හදිසියේ නැතිවීම හෝ ගිනි ගැනීමට ලක්විය හැකි බව සඳහන්.
මේ හේතුවෙන් වාහනයේ ගමන් කරන්නන්ට හෝ මාර්ගයේ ගමන් ගන්නා මගීන්ට ජීවිත අවදානම ඉහළ වන බවයි වාර්තා වන්නේ.
බලපෑමට ලක් වූ වාහනවල හිමිකරුවන් වෙත මේ වන විටත් මේ පිළිබඳ දැනුම් දී ඇති අතර අවශ්‍ය අලුත්වැඩියාවන් සඳහා ළඟම ඇති අලෙවි නියෝජිතයින් හා සම්බන්ධ වන්නැයි උපදෙස් ලබා දී තිබෙනවා.
