ටස්මේනියා හි අමතර සරසවි සිසුන් 500 දෙනෙකුට ඩොලර් 5,000 ක් බැගින් වන වාර්ෂික ශිෂ්‍යත්ව පිරිනැමීමට ලේබර් පක්ෂය යෝජනා කර තිබෙනවා.
ඉදිරි ප්‍රාන්ත මැතිවරණය ජයගතහොත් එය ක්‍රියාවට නංවන බවයි ප්‍රාන්ත විපක්ෂ නායක රෙබෙකා වයිට් නිවේදනය කලේ.
මේ සඳහා වසරකට වැය කිරීමට අපේක්ෂිත මුදල ඩොලර් මිලියන 2.5 ක්.
ආර්ථික අපහසුතා හමුවේ සරසවි අධ්‍යාපනය සඳහා අසීරුතා ඇති සිසුන්ට සහය පිණිස මෙම යෝජනාව හඳුන්වා දෙන බවද ලේබර් පක්ෂය සඳහන් කරනවා.
පාඨමාලාව පවත්වාගෙන යාමට ප්‍රමාණවත් මුදල් නොමැතිකමින් වසරකට ටස්මේනියා හි සිසුන් 1,000 ක් පමණ සිය අධ්‍යාපන කටයුතු අතරමගදී නතර කරන බවටයි අනාවරණය වී ඇත්තේ.
මෙම ඩොලර් 5,000 ක මුදල පාඨමාලා ගාස්තු – ප්‍රවාහන වියදම් – නිවාස කුළී ගෙවීම සඳයා වුවද යොදා ගත හැකියි.
