අද සිට ඕස්ට්‍රේලියානුවන්ට හිමිවන දීමනා කිහිපයක ඉහළයාමක් සිදුවනවා.
ඒ අනුව මෙරට අවම වැටුප සියයට 8.6 කින් වැඩිවන අතර සතියක අවම වැටුප ඩොලර් 882.80 ක් හෝ පැයකට ඩොලර් 23.23 ක් දක්වා ඉහළ යනු ඇති.
වැඩිහිටි ඕස්ට්‍රේලියානුවන්ට තම Superannuation ගිණුමෙන් බදු රහිත විශ්‍රාම ආදායම් ගිණුම වෙත ගෙන යා හැකි මුදල තවත් ඩොලර් ලක්ෂ දෙකකින් වැඩි කිරීමද අද සිට බලාත්මකයි.
ඒ අනුව මීට පෙර ඩොලර් මිලියන 1.7 ක් වූ එම මුදල අද සිට ඩොලර් මිලියන 1.9 ක් දක්වා ඉහළ දමා තිබෙනවා.
Superannuation අරමුදල සඳහා සේවායෝජකයන් විසින් දායකවන ප්‍රතිශතය මෙතෙක් පැවති සියයට 10.5 සිට අද සිට සියයට 11 දක්වා ඉහළයාමට නියමිතයි.
Aged care ක්ෂේත්‍රයේ ශ්‍රමිකයින්ගේ වැටුප් අද සිට 15% කින් වැඩිකරන බවට පසුගිය ඔස්ට්‍රේලියානු ෆෙඩරල් අය වැයේදී ප්‍රකාශ කෙරුණා.
මේ අනුව Aged care ක්ෂේත්‍රයේ හෙදියන්ට වසරකට අමතර ඩොලර් 10,000 ක් උපයා ගත හැකි අතර personal care සේවකයින්ට වසරකට අමතර ඩොලර් 7,000 ක් උපයා ගත හැකි වනු ඇති.
වසරකට ඩොලර් 80,000 ට වඩා අඩුවෙන් උපයන පවුල් වලට child care ගාස්තුවලින් 90% ක් දක්වා සහනාධාරයක් ලබාගැනීමටද අද සිට අවස්ථාව උදාවනවා.
එමෙන්ම Child care සහනාධාර සඳහා සුදුසුකම් ලබන පවුලක උපරිම ආදායම ද ඩොලර් 346,000 සිට ඩොලර් 530,000 දක්වා ඉහළ දැමීම අද සිට බලාත්මකයි.
ඒ අනුව පවුල් මිලියන 1.2 ක් පමණ Child care සඳහා අද සිට අඩු මුදලක් ගෙවීමට නියමිතව තිබෙනවා.
අලුත උපන් බිළිඳුන්ගේ දෙමව්පියන්ට හිමිවන වැටුප් සහිත නිවාඩු ප්‍රමාණය අද සිට සති 20 ක් දක්වා ඉහළයාමද බලාත්මකයි.
