සිඩ්නි බ්ලැක්ටවුන්හි නිවසකට පසුගිය සති දෙකකදී කිසියම් පිරිසක් විසින් අවස්ථා දෙකකදී වෙඩි තැබීමේ සිද්ධිය පිළිබඳ පොලිසිය පරීක්ෂණ ආරම්භ කර තිබෙනවා.
නිව් සවුත්වේල්ස් පොලිසිය පවසන්නේ වැරදි වටහා ගැනීමක් හේතුවෙන් මෙම වෙඩි තැබීම සිදුවන්නට ඇති බවටයි.
මෙම වෙඩි තැබීමේ අවස්ථා දෙකේදීම පුද්ගලයන් පස් දෙනෙකු එහි සිටි අතර කිසිවෙකුටත් තුවාල සිදුවී නැහැ.
වෙඩි තැබීමට සම්බන්ධ යැයි විශ්වාස කරන වාහනයක් කිලෝමීටර් අටක් පමණ දුරින් අතහැර දමා තිබියදී හමුවී ඇති අතර එහි හිමිකරු සොයා ගැනීමට රහස් පරීක්ෂකයින් කටයුතු කරමින් සිටිනවා.
අප්‍රේල් 13 වැනිදා සහ පසුගිය සෙනසුරාදා රාත්‍රී වර්ජිනියා වීදියේ පිහිටි මෙම නිවසට වෙඩි කිහිපයක් එල්ල වී තිබුණා.
මෙම නිවසේ සිටින පවුල සම්බන්ධයෙන් පොලිසියේ කිසිදු පැමිණිල්ලක් හෝ අපරාධයක් සම්බන්ධයෙන් චෝදනා එල්ලවුවන් නොවන අතර මෙය වැරදි හඳුනා ගැනීමක් හේතුවෙන් සිදුවූවක් බවටයි පොලිසිය විශ්වාස කරන්නේ.
වෙඩි තැබීමේ සිද්ධීන් පිළිබඳව තොරතුරු දන්නා ඕනෑම අයෙකුට පොලිසියට දැනුවත් කරන ලෙසට ඉල්ලීමක් කෙරෙනවා.
