මදුරුවන් මගින් බෝවන මරේ වැලි එන්සෙපලයිටීස් වෛරසය ආසාධනය වීමෙන් වසර 50 කට පමණ පසු වික්ටෝරියා ප්‍රාන්තයේ පළමු මරණය වාර්තා වී තිබෙනවා.
බටහිර වික්ටෝරියා හි පදිංචි 60 හැවිරිදි කාන්තාවක මෙලෙස ජීවිතක්ෂයට පත්ව ඇති බව සඳහන්.
පළමුවෙන් සැක පළවී තිබුණේ ඇයට ජැපනීස් එන්සෙපලයිටීස් වැළඳී ඇති බවටයි.
කෙසේවෙතත් දීර්ඝ පරීක්ෂාවන්ගෙන් අනතුරුව තහවුරු කරගෙන ඇත්තේ ඇය මියගොස් ඇත්තේ මරේ වැලි එන්සෙපලයිටීස් ආසාධනය වීමෙන් බවටයි.
අවසාන වරට වික්ටෝරියා ප්‍රාන්තයෙන් මෙවැනි මරණයක් වාර්තා වී ඇත්තේ 1974 වසරේදීයි.
එහෙත් මරේ වැලි එන්සෙපලයිටීස් වැළඳීමෙන් නිවු සවුත් වේල්ස් සහ දකුණු ඔස්ටේ්‍රලියාවෙන් 2011 වසරේදී මරණ 02 ක් සටහන්වී තිබුණා.
මදුරුවන් ආශ්‍රිතව ව්‍යාප්ත වන මෙම වෛරසය ආසාධනය නොවීමට හැකිතාක් මදුරු දෂ්ඨන වළක්වා ගැනීමට පියවර ගන්නා ලෙස වික්ටෝරියා ප්‍රාන්ත බළධාරීන් ජනතාවට දැනුම් දෙනවා.
ඒ අනුව සිරුර හැකිතාක් ආවරණය වන ඇඳුම් භාවිතය සහ ගොවිපොළ ආශ්‍රිතව රැකියා කරන්නන් සහ වාසය කරන්නන් විමසිලිමත්වීම වැදගත් බව සඳහන්.
මරේ වැලි එන්සෙපලයිටීස් වෛරසය සඳහා මෙතෙක් එන්නතක් සොයාගෙන නොමැති අතර එය ඇතැම්විට මාරාන්තික බවයි පැවසෙන්නේ.
අධික උණ – හිසරදය – ඇගපත රුදාව – වමනය සහ මස්පිඩු වේදනා එහි රෝග ලක්ෂණ අතර වනවා.
