කොවිඩ් ආසාධිත බව දැනුවත්ව Aged care මධ්‍යස්ථානයක සේවය කල මෙල්බන් හෙදියකට ඩොලර් 25,000 ක දඩයක් නියම කර තිබෙනවා.
36 හැවිරිදි ඇය Moorabbin මහේස්ත්‍රාත් අධිකරණය හමුවට අද ඉදිරිපත් කෙරුණු අවස්ථාවේදීයි මෙම දඩය නියම කර ඇත්තේ.
කොවිඩ් පරීක්ෂණයක් සඳහා පෙනී සිටින ලෙසත් එහි ප්‍රථිඵලය ලැබෙන තුරු සේවයට නොයන ලෙසත් වෛද්‍යවරයා විසින් උපදෙස් ලබාදී තිබියදිත් මෙම තැනැත්තිය 2020 වසරේ ජූලි 26 හා 27 යන දිනවලදී Highett හි Menarock Aged Care වෙත රැකියාවට ගොස් තිබෙනවා.
රැකියා ස්ථානයටද ඇය දන්වා තිබුණේ තමාට කිසිදු රෝග ලක්ෂණයක් නොමැති බවටයි.
ජූලි 30 වනදා මෙම තැනැත්තිය කොවිඩ් ආසාධිත බවට තහවුරු වූ අතර එහි නේවාසිකයෙකුද කොවිඩ් ආසාධිත බව පසුව තහවුරු කර ගැණුනා.
වික්ටෝරියා ප්‍රාන්තයේ කොවිඩ් රෙගුලාසි කඩ කිරීමේ චෝදනාව යටතේ අදාළ හෙදියට එරෙහිව නඩු පැවරීමටයි බළධාරීන් පියවර ගනු ලැබුවේ.
