ලංකාවේ ව්‍යාපෘති සඳහා ඩොලර් ලක්ෂ ගණනක අල්ලස් දුන් සිඩ්නි දෙදෙනෙකු අත්අඩංගුවට

ශ්‍රී ලංකාවේ ඉදි කිරීම් ව්‍යාපෘති 02 ක් සඳහා ඩොලර් ලක්ෂ ගණනක අල්ලස් දුන් බව කියන සිඩ්නි පදිංචිකරුවන් දෙදෙනෙකු අත්අඩංගුවට ගෙන තිබෙනවා.

ඔස්ටේ්‍රලියානු ෆෙඩරල් පොලිසිය විසින් දීර්ඝ කාලයක් පුරා සිදුකල විමර්ශනයක ප්‍රථිඵලයක් ලෙසයි මොවුන් අත්අඩංගුවට ගෙන ඇත්තේ.

2009 සහ 2016 අතර කාලයේදී සැකකරුවන් විසින් අදාළ ව්‍යාපෘතිවලට අදාළව විදේශීය රාජ්‍ය නිළධාරීන් වෙත ලබාදී ඇති බව පැවසෙන මුදල ඩොලර් 304,000 ක්.

67 සහ 71 හැවිරිදි සැකකරුවන් දෙදෙනා ඔස්ටේ්‍රලියාව තුළ ක්‍රියාත්මක මහා පරිමාණ ඉංජිනේරු සමාගමක (SMEC) නියෝජිතයන් බවටයි හඳුනාගෙන ඇත්තේ.

FBI ආයතනය – කැනඩා පොලිසිය – ශ්‍රී ලංකා – ඉන්දියා සහ බංග්ලාදේශ පොලිසි ද සම්බන්ධ කරගනිමින් ඔස්ටේ්‍රලියානු ෆෙඩරල් පොලිසිය මෙම දැවැන්ත මෙහෙයුම ක්‍රියාත්මක කර තිබෙනවා.

ඒ සඳහා ඔස්ටේ්‍රලියානු ආයෝජන කොමිසම – වෙළඳ කොමිසම විසින්ද සහය දි තිබු බව සඳහන්.

සැකකරුවන්ට වසර 10 ක පමණ සිර දඩුවම් නියමවනු ඇති බවටයි ඔස්ටේ්‍රලියානු ෆෙඩරල් පොලිසිය අනාවැකි පළකරන්නේ.