ශ්‍රී ලංකාවේ පවතින දේශපාලන සහ ආර්ථික අර්බුදකාරී වාතාවරණය සමථයකට පත් කිරීම සඳහා වැඩි කාර්යභාරයක් ඉටු කරන්නැයි අමෙරිකානු සෙනට් සභාවේ විදේශ සබඳතා කමිටුව ක්වඩ් සාමාජික රටවලින් ඉල්ලීමක් කරනවා.
අමෙරිකාව – ජපානය – ඉන්දියාව සහ ඔස්ටේ්‍රලියාවේ එකමුතුවෙන් සැදුම් ලත් සංවිධානයයි ක්වඩ් ලෙස හැඳින්වෙන්නේ.
මානුෂීය සහනාධාර දීමට ඉන්දියාව කටයුතු කරමින් සිටීමද අමෙරිකානු සෙනට් කමිටුවේ ප්‍රසාදයට ලක්වී තිබෙනවා.
අමෙරිකා රාජ්‍ය ලේකම් ඇන්තනී බ්ලින්කන් – ජපාන විදේශ අමාත්‍ය හයාෂි යොෂිමසා – ඉන්දීය විදේශ අමාත්‍ය එස් ජයිශංකර් සහ ඔස්ටේ්‍රලියා විදේශ අමාත්‍ය පෙනී වොංග් වෙත ලිපියක් යොමු කරමින් අමෙරිකානු සෙනට් සභාවේ විදේශ සබඳතා කමිටුව අවධාරණය කරන්නේ අදාළ රටවලට ශ්‍රී ලංකාව පිළිබඳ තවත් පුලුල් කාර්ය භාරයක් ඉටු කල හැකි බවයි.
විශේෂයෙන් ණය ආධාර සැපයීම සහ මානුෂීය සහන සැපයීම වැනි දෑ කෙරෙහි එහිදී ප්‍රමුඛත්වය දිය යුතු බවයි ඔවුන් සඳහන් කරන්නේ.
