කාන්තාවන්ට එරෙහි ප්‍රචණ්ඩත්වයට විරෝධය පළ කරමින් දහස් ගණනක් එක්වූ පා ගමන් සඳහා අග්‍රාමාත්‍ය ඇල්බනීස් අද කැන්බරාහිදී එක්ව තිබෙනවා.
කාන්තාවන්ට එරෙහි ප්‍රචණ්ඩත්වය පිටුදැකීමට පියවර ගන්නා ලෙස ඉල්ලමින් ඔස්ට්‍රේලියාව පුරා පැවති විරෝධතාවන්ට දහස් සංඛ්‍යාත ජනතාවක් අද එක්ව සිටි බවයි වාර්තා වන්නේ.
අඛණ්ඩව තුන්වන දිනටත් අද දිනයේ බ්‍රිස්බේන්, මෙල්බර්න්, ගෝල්ඩ් කෝස්ට්, කැන්බරා සහ පර්ත් යන නගරවල රැලි පැවැත්වුණු බව සඳහන්.
කාන්තාවන්ට එරෙහි ප්‍රචණ්ඩත්වය හේතුවෙන් ජාතික වශයෙන් හදිසි අවස්ථාවක් ප්‍රකාශයට පත් කිරීමට පෙලපාලිකරුවන් රජයෙන් ඉල්ලා සිටියා.
ප්‍රචණ්ඩත්වයට එරෙහි උපදේශකයින් විසින් සම්පාදනය කරන ලද දත්තවලට අනුව මේ වසරේ ඔස්ට්‍රේලියාවේ ස්ත්‍රී පුරුෂ සමාජභාවය පදනම් කරගත් ප්‍රචණ්ඩත්වය හේතුවෙන් අවම වශයෙන් කාන්තාවන් 26 දෙනෙකු මිය ගොස් තිබෙනවා.
එමෙන්ම අග්‍රාමාත්‍ය ඇන්තනි ඇල්බනිස් ට්විටර් සටහනක් තබමින් ප්‍රකාශ කර ඇත්තේ මෙම වසරේ මේ දක්වා සෑම දින හතරකට වරක් කාන්තාවක් ඝාතනය කර ඇති බවට තොරතුරු ලැබී ඇති බවයි.
මෙල්බන්හි පැවති පාගමනකට වික්ටෝරියානු අගමැතිනි ජසින්තා ඇලන් ද සහභාගී වූ අතර උත්සවය සඳහා විශාල ජනතාවක් එක්රැස් කිරීම ගැන ඇය සංවිධායකයින්ට ස්තුතිය පුද කර තිබෙනවා.
