වික්ටෝරියා ප්‍රාන්තයේ සුපිරි වෙළඳසැල් සේවකයන් සඳහා බලාත්මක හුදකලා කිරීම් නීති සංශෝධනය කිරීමට තීරණය වී තිබේ.
ඒ Coles සහ Woolworths ඇතුලු සුපිරි වෙළඳසැල් ආයතන විසින් කරන ලද ඉල්ලීම් සැළකිල්ලට ගෙනයි.
වික්ටෝරියා ප්‍රාන්ත අගමැති ඩැනියල් ඇන්ඩෲස් කියාසිටියේ සංශෝධනය කෙරෙන නීති කවරේදැයි ඉදිරියේදී ප්‍රකාශයට පත් කරන බවයි.
සුපිරි වෙළඳසැල්වලට පැමිණෙන කොවිඩ් ආසාධිතයන් හේතුවෙන් සමස්ත සේවකයන් හුදකලා කිරීමත් අවධානම් ස්ථාන ලෙස නම් කිරීමත් නිසා වික්ටෝරියා හි සුපිරි වෙළඳසැල් පවත්වාගෙන යාමට දැඩි බාධා එල්ලවී තිබේ.
එබැවින් ඇතැම් අලෙවිසැල් විවෘත පැය ගණන සීමා කිරීමටත් ඇතැම් අලෙවි සැල්වල සේවාවන් අඩු කිරීමටත් සිදුවන බවට සුපිරි වෙළඳසැල් හිමියන් කල දැනුම්දීම් සැළකිල්ලට ගෙනයි වික්ටෝරියා ප්‍රාන්ත රජය මෙම තීරණය ගෙන ඇත්තේ.
Coles ආයතනය පසුගියදා කියාසිටියේ සිය සේවකයන් 30,000 ක් පමණ දැනට හුදකලා කර ඇති බැවින් සේවා පවත්වාගෙන යාම දැඩි අසීරු වී ඇති බවයි.
ඒ කොවිඩ් ආසාධිත පාරිභෝගිකයන් පැමිණිමත් සමග අවධානම් ස්ථාන ලැයිස්තුවට ඇතුළත් කිරීම නිසාවෙනි.
කෙසේවෙතත් මෙම සේවක පිරිස් අතුරින් කිසිවෙකුත් කොවිඩ් ආසාධිතයන් ලෙස වාර්තා වී නැහැ.
එබැවින් සෘණාත්මක ප්‍රථිඵලයක් ලද වහා යළිත් සේවයට පැමිණීමටත් හුදකලා භාවයෙන් ඉවත් වීමටත් හැකිවන පරිදි සුපිරිවෙළඳසැල් සඳහා ඇතැම් නීති රීති වෙනස් කරන ලෙස ඒවායෙහි කළමණාකාරීත්වය වික්ටෝරියා සෞඛ්‍ය අංශවලින් ඉල්ලා සිටීයේය.
