Day: March 22, 2021

අමෙරිකාවේ හිටපු ජනාධිපති ඩොනල්ඩ් ට්‍රම්ප් තමාගේම “සමාජ මාධ්‍ය ජාලයක්” ඇරඹීමට සූදානමින් සිටින බව වාර්තා වේ. ඔහුගේ උපදේශක ජේසන් මිලර් පැවසුවේ, “මම හිතනවා මාස දෙක තුනකින් ඔහුගේම සමාජ මාධ්‍ය ජාලයකින් ඔහු නැවත සමාජ මාධ්‍ය ට එක්වෙයි.” “එම නව සමාජ මාධ්‍ය ජාලය සිත් ඇදගන්නා සුළු මෙන්ම මෙම ක්ෂේත්‍රයේ වෙනසක් සිදු කිරීමට සමත් වෙයි.” පසුගිය ජනවාරි මාසයේදී ඔහුගේ අනුගාමිකයින් කැපිටල් ගොඩනැගිල්ල ආක්‍රමණය කරමින් විරෝධතා පැවැත්වීමේ සිදුවීමෙන් අනතුරුව ෆේස්බුක් සහ ට්විටර් ආයතන ට්‍රම්ප්ගේ ගිණුම් අවහිර කිරීමට ක්‍රියා කළේය.

ගංවතුර හේතුවෙන් නිව් සවුත් වේල්ස් ප්‍රාන්තයේ 18,000ක් පමණ ජනතාව ආරක්‍ෂිත ස්ථාන කරා යොමුකර තිබේ. විශේෂයෙන්ම එහි නැගෙනහිර වෙරළබඩ කලාපයට දැඩි බලපෑම් ඇතිව තිබෙන බව වාර්තා වේ. දින කිහිපයක් පුරා පැවති අධික වර්ෂාව හේතුවෙන් සිඩ්නි හි ගංගා සහ වේලි පිටාරගලමින් පවතී. එම ප්‍රාන්තයේ මෙවැනි ගංවතුර තර්ජනයක් වාර්තා වී ඇත්තේ වසර 50කින් පමණ පසුව ය. උන්හිටි තැන් අහිමි වූ පිරිස් සඳහා මූල්‍යාධාර පිරිනමන බව අගමැති ස්කොට් මොරිසන් සඳහන් කරයි.

ඔස්ටේ්‍රලියාව සමග ඇති කිරීමට යෝජිත සංචාරක බුබුළ ක්‍රියාවට නංවන දිනය ලබන මස 06 වනදා ප්‍රකාශයට පත් කරන බව නවසීලන්ත අග්‍රාමාත්‍ය ජසින්ඩා ආර්ඩර්න් මහත්මිය පවසනවා. සාකච්ඡා වට 12 කින් පසු දෙපාර්ශවය අතර එකගතා මාලාවකට පැමිණීමට හැකිවූ බවයි වෙලින්ටන් අගනුවරදී පැවති මාධ්‍ය හමුවකදී ඇය කියාසිටියේ. වීසා නිකුත් කිරීම කෙරෙහි පමණක් තවදුරටත් සාකච්ඡා පැවැත්වෙන බවද අග්‍රාමාත්‍යවරිය කියාසිටියා. ඔස්ටේ්‍රලියාව මෙන්ම නවසීලන්තයද සතුටුදායක මට්ටමකට කොවිඩ් වෛරසය පාලනය කර ඇති බැවින් මෙම සංචාරක බුබුළ ඇති කිරීමට යෝජනා වී තිබෙනවා.

දශක කිහිපයකට පසු බලපා ඇති දරුණුතම ජල ගැලීම් තත්වය හේතුවෙන් සිඩ්නි නගරවාසීන් දහස් සංඛ්‍යාත පිරිසක් ආරක්ෂිත ස්ථාන වෙත ඉවත් කර තිබෙනවා. 1961 වසරෙන් පසු ගංගා රැසක් ඉහළම ජල මට්ටම් වාර්තා කර ඇති බවයි වාර්තා සඳහන් කලේ. පාසල් සහ කාර්යාල රැසක් වසා දමා ඇති අතර අභ්‍යන්තර ගුවන් ගමන් සිදු කෙරෙන ගුවන් තොටුපළද වසා දමා ඇත. පවතින තත්වය ඉදිරි දින කිහිපය තුළද පැවතිය හැකි බවට ඔස්ටේ්‍රලියානු කාළගුණ අංශ අනතුරු අගවා තිබෙනවා.