භාරත ලක්ෂ්මන් ප්‍රේමචන්ද්‍ර ඝාතනයට අදාළව සිර දඩුවම් විඳිමින් සිටි හිටපු පාර්ලිමේන්තු මන්ත්‍රී දුමින්ද සිල්වාට ජනාධිපති පොදු සමාව ලැබී තිබෙනවා.
බන්ධනාගාර මාධ්‍ය ප්‍රකාශක බන්ධනාගාර කොමසාරිස් චන්දන ඒකනායක සඳහන් කලේ පොසොන් පොහොය දිනයට සමගාමීව අද දිනයේදී නිදහස ලැබූ 93 දෙනා අතර හිටපු මන්ත්‍රී දුමින්ද සිල්වාද වන බවයි.
අයුතු ලෙස රඳවාගෙන සිටි හිටපු එල් ටී ටී ඊ සැකකරුවන් 16 දෙනෙකු සහ වෙනත් වැරදි මත බන්ධනාගාර ගතවූවන් 77 දෙනකු මෙලෙස නිදහස් කර තිබෙනවා.
2011 වසරේ ඔක්තෝබර් 08 වනදා පළාත් පාලන මැතිවරණය පැවති දිනයේදී මුල්ලේරියාවේදී සිදුවු වෙඩි තැබීමකින් භාරත ලක්ෂ්මන් ප්‍රේමචන්ද්‍ර ඇතුලු 04 දෙනෙකු ඝාතනයට ලක්වූ අතර දුමින්ද සිල්වා ඇතුළු විත්තිකරුවන් 13 දෙනෙකුට එරෙහිව නීතිපතිවරයා කොළඹ මහාධිකරණය හමුවේ නඩු පැවරුවේ, 2015 වසරේ මාර්තු මස 03 වෙනිදායි.
එහිදී, නීතිපතිවරයා විසින් විත්තිකරුවන්ට එරෙහිව එල්ල කරනු ලැබූ අධිචෝදනා සංඛ්‍යාව 17 ක්.
මිනී මැරීම, මිනී මැරීමට තැත් කිරීම, මිනී මැරීමට කුමන්ත්‍රණය කිරීම, නීති විරෝධී රැස්වීම ඇතුළු චෝදනා රැසක් ඊට ඇතුළත්.
ඒ සම්බන්ධයෙන් වැරදිකරුවන් වූ හිටපු පාර්ලිමේන්තු මන්ත්‍රී දුමින්ද සිල්වා ඇතුළු පස්දෙනෙකුට කොළඹ මහාධිකරණය විසින් මරන දණ්ඩණය නියම කරනු ලැබුවේ 2016 වසරේ සැප්තැම්බර් 08 වෙනිදායි.
එම නියෝගය අහෝසි කර සියලූ චෝදනාවලින් නිදොස් කොට නිදහස් කරන ලෙස ඉල්ලා දුමින්ද සිල්වා සහ තවත් සිව් දෙනෙකු ශ්‍රේෂ්ඨාධිකරණය හමුවේ අභියාචනා පෙත්සම් ගොණුකල අතර මහාධිකරණයේ දඩුවම එහිදී නැවතත් ස්ථිර කෙරුණා.
කෙසේවෙතත් දේශපාලන පළිගැනීම් පිළිබඳ ජනාධිපති කොමිසම නියම කර තිබුණේ හිටපු මන්ත්‍රී දුමින්ද සිල්වාට කිසියම් සහනයක් සැළසිය යුතු බවටයි.
