රැඳවුම් කඳවුරක සිටි ශ්‍රී ලාංකික තරුණියකගේ මරණයත් සමග හටගත් දෝෂාරෝපණ හමුවේ යෝජිත නව සංක්‍රමණ පණත හකුලා ගැනීමට ජපාන රජයට සිදුවී තිබෙනවා.
එම පණතින් රැඳවුම් මධ්‍යස්ථාන බළධාරීන්ට වැඩි බලතල හිමිවීමත් දේශපාලන රැකවරණ පතන්නන් පිටුවහල් කිරීමටත් වැඩි බලතල හිමිවීමත් ඊට හේතුවයි.
33 හැවිරිදි ශ්‍රී ලාංකික කාන්තාවක පසුගිය මාර්තු මාසයේදී ජපාන රැඳවුම් කඳවුරකදී මියගොස් තිබුණේ දීර්ඝ කාලයක් නිරාහාරව සිටියදීයි.
එම ස්ථානයේදී ඇයට ප්‍රමාණවත් අත්‍යවශ්‍ය පහසුකම් හෝ නොලැබුණු බවට චෝදනා පවතිනවා.
ඇය ශිෂ්‍ය වීසා මත ජපානයට ගොස් තිබූ අතර පසුගිය අගෝස්තු මාසයේ සිට රැඳවුම් භාරයේ පසුවී ඇත්තේ වීසා කාලය ඉක්මවා සිටීම හේතුවෙනුයි.
එවැනි වාතාවරණයක් හමුවේ ජපානය විසින් ගෙන ඒමට යෝජිතව තිබූ නව සංක්‍රමණ පණතින්ද රැඳවුම් භාරයේ සිටින්නන් තවත් පීඩාවන්ට ලක්කෙරෙන බවට ජපාන සමාජය තුළ ප්‍රබල කථිකාවතක් නිර්මාණය වී තිබුණා.
එම තත්වය හමුවේයි පණත් කෙටුම්පත ඉවත් කර ගැනීමට ජපාන රජය සැළසුම් කර ඇත්තේ.
