හෙට අලුයම 4.00 සිට බලපැවැත්වෙන පරිදි ශ්‍රී ලංකාවට පැමිණෙන ගුවන් මගීන් සීමා කිරීමට සිවිල් ගුවන් සේවා අධිකාරිය විසින් තීරණය කර තිබෙනවා.
ඒ අනුව එක් ගුවන් යානයකින් ශ්‍රී ලංකාවට පැමිණිය හැකි උපරිම මගීන් සංඛ්‍යාව 75ක් ලෙස සීමා කොට ඇති බවයි සිවිල් ගුවන් සේවා අධිකාරියේ සභාපති උපුල් ධර්මදාස සඳහන් කළේ.
මෙම සීමා කිරිම හෙට සිට දින 14 ක කාලයක් සඳහා වලංගු වන බව පැවසූ සභාපතිවරයා රටේ කොවිඩ් ව්‍යාප්තිය සම්බන්ධයෙන් සලකා බලා ඉදිරි ක්‍රියාමාර්ග ඉන් පසුව ගන්නා බවද සඳහන් කර සිටියා.
මිට පෙර ශ්‍රී ලංකාවට පැමිණෙන ගුවන් යනාවකට උපරිම වශයෙන් ලාංකික පුරවැසියන් 75ක් සහ ඊට අමතරව විදේශීය සංචාරකයින් රැගෙන ඒමට අවසර ලබාදී තිබු බවයි සිවිල් ගුවන් සේවා අධිකාරියේ සභාපතිවරයා සඳහන් කළේ.
නව සීමා කිරීම් වලට යටත්ව හෙට අලුයම සිට ශ්‍රී ලංකාවට පැමිණිය හැක්කේ එක් ගුවන් යානයකින් ලාංකික පුරවැසියන් සහ විදේශීය සංචාරකයින් 75 දෙනෙකුට පමණයි.
