ජපානයේ හිස් වූ නිවාස සංඛ්‍යාව මිලියන නවයක වාර්තාගත ප්‍රමාණයක් දක්වා ඉහළ ගොස් තිබෙනවා.
එරට දිනෙන් දින අඩුවෙමින් පවතින ජනගහනය හේතුවෙන් මෙම තත්වය මතුවී ඇති බවයි පැවසෙන්නේ.
සිඩ්නි, බ්‍රිස්බේන් සහ ඇඩිලේඩ්හි සමස්ත ජනගහනයට වඩා ජපානයේ හිස් වූ නිවාස ප්‍රමාණය ඉහළ ගොස් තිබීම විශේෂත්වයක්.
ජපානයේ අතහැර දැමූ නිවාස අකියා ලෙස හැඳින්වෙන අතර ටෝකියෝ සහ කියෝතෝ වැනි ප්‍රධාන නගරවල වැඩිපුර අකියා දක්නට ලැබෙන බවයි පැවසෙන්නේ.
සෑම වසරකම උපදින දරුවන්ගේ සංඛ්‍යාවේ භයානක පහත වැටීමක් පෙන්නුම් කෙරෙන ජපාන රජය මේ වන විට වයස්ගත ජනගහණයක් සමඟ ගැටලුවලට මුහුණ දෙමින් සිටිනවා.
මෙය ජපානයේ ජනගහන පරිහානියේ ලක්‍ෂණයක් බවයි චිබා ජාත්‍යන්තර අධ්‍යයන විශ්ව විද්‍යාලයේ කථිකාචාර්ය ජෙෆ්රි හෝල් පෙන්වා දෙන්නේ.
අභ්‍යන්තර කටයුතු සහ සන්නිවේදන අමාත්‍යාංශය විසින් සම්පාදනය කරන ලද සංඛ්‍යාලේඛනවලට අනුව, ජපානයේ සියලුම නේවාසික දේපළවලින් සියයට 14ක් හිස්ව පවතිනවා.
ජපානයේ ජනගහනය වසර කිහිපයක් තිස්සේ අඩුවෙමින් පවතින අතර 2022 වසරේ අවසාන ගණනය කිරීම් අනුව, ජනගහනය මිලියන 125.4 දක්වා 800,000කින් අඩු වී තිබූ බව සඳහන්.
ජපානයේ උපත් අනුපාතිකය වසර ගණනාවක් තිස්සේ 1.3ක් පමණ වූ අතර, ස්ථාවර ජනගහනයක් පවත්වා ගැනීමට අවශ්‍ය උපත් අනුපාතිකය වන්නේ 2.1ක්.
පසුගිය සතියේ ජපාන අභ්‍යන්තර කටයුතු හා සන්නිවේදන අමාත්‍යාංශය පැවසුවේ වයස අවුරුදු 15 ට අඩු දරුවන්ගේ සංඛ්‍යාව ද අඛණ්ඩව 43 වන වසරටත් වාර්තාගත ලෙස පහත වැටී ඇති බවයි.
