සිඩ්නි හෙබර්ෂාම් ප්‍රදේශයේ උද්‍යානයක පාපන්දු ක්‍රීඩා තරගයක් අතරතුර පුද්ගලයෙකුට පිහියෙන් ඇන පළා ගිය පුද්ගලයෙකු පොලිස් අත්අඩංගුවට ගෙන තිබෙනවා.
සැකකරු එක් පුද්ගලයෙකුට පිහියෙන් ඇන තවත් පිරිසක් ලුහුබැඳ ගිය බවටයි චෝදනා එල්ල වී ඇත්තේ.
අවට සිටි පිරිස විසින් මෙම පුද්ගලයා අල්ලා රඳවා තබාගෙන පොලිසියට භාරදී ඇති අතර සැකකරු මවුන්ට් ඩ්‍රූට් ප්‍රාදේශීය අධිකරණයට ඉදිරිපත් කිරීමට නියමිතයි.
සඳුදා සවස 5:45ට පමණ හෙබර්ෂාම් හි හෙබර් උද්‍යානයට පොලිස් නිලධාරීන් කැඳවා ඇත්තේ පුද්ගලයෙකු පිහියක් අතැතිව තර්ජනාත්මකව හැසිරීම හේතුවෙන්.
24 හැවිරිදි තරුණ සැකකරු 20 හැවිරිදි තරුණයෙකුගේ ගෙළට පහරදී පිහි රැගෙන උද්‍යානයේ සිටි කිහිප දෙනෙකු ලුහුබැඳ ගිය බව සඳහන්.
එම අවස්ථාවේ කුඩා ළමයින් ද උද්‍යානයේ සෙල්ලම් කරමින් සිටි බවයි වාර්තා වන්නේ.
පිහි පහරට ලක්වූ පුද්ගලයාගේ හිසට සහ බෙල්ලට තුවාල සිදුවී ඇති අතර ඔහු ස්ථාවර තත්ත්වයෙන් නේපීන් රෝහලට ගෙන ගොස් තිබෙනවා.
ප්‍රධාන පොලිස් පරීක්ෂක පෝල් ටික්නර් පැවසුවේ මෙම පුද්ගලයාගේ මානසික ආබාධයක් හේතුවෙන් මෙම පිහි ඇනුම සිදු කරන්නට ඇති බවටයි.
