රුසියානු මිසයිලය ප්‍රහාරයකින් යුක්රේනයේ ඔඩේසා වරාය නගරයේ පිහිටි ‘හැරී පොටර් කාසල්’ නම් ප්‍රසිද්ධ ගොඩනැගිල්ලක් විනාශ වී තිබෙනවා.
මෙම ප්‍රහාරයෙන් පුද්ගලයින් හතර දෙනෙකු මිය ගොස් තවත් තිස් දෙදෙනෙකු තුවාල ලැබූ බවයි විදෙස් මාධ්‍ය වාර්තා කළේ.
සුනඛයෙකු ද මරණයට පත්වී ඇති අතර තුවාල ලැබූ 28 දෙනා අතර කුඩා ළමයින් මෙන්ම ගර්භනී කාන්තාවක් සිටින බව ඔඩෙසා ප්‍රාදේශීය ආණ්ඩුකාර ඔලේ කිපර් තහවුරු කළා.
හැරී පොටර් කාසල් යනු ප්‍රහාරයෙන් තුවාල ලබා ඇති යුක්රේන පාර්ලිමේන්තු මන්ත්‍රී සර්හි කිවලාව්ගේ නිවස බව ප්‍රාදේශීය මාධ්‍ය වාර්තා කර තිබෙනවා.
මන්ත්‍රීවරයා විසින් පවත්වාගෙන යනු ලබන ඔඩේසා නීති ඇකඩමිය ද එහි පිහිටා ඇති බව සඳහන්.
මෙම ප්‍රහාරය සම්බන්ධයෙන් යුක්රේන ජනාධිපතිවරයා වීඩියෝ පණිවුඩයක් නිකුත් කරමින් කියාසිටියේ මියගිය සහ තුවාල ලැබූවන්ගේ පවුල්වලට තම ශෝකය පළ කරන බවයි.
රුසියාවේ මිසයිල ප්‍රහාර මෙන්ම යුක්‍රේනය විනාශ කිරීමට දරන සියලු ප්‍රයත්න නතර කිරීමට හැකි සෑම පියවරක්ම ගන්නා බවයි ඔහු අවධාරණය කළේ.
