2024 පළමු කාර්තුවේ ශ්‍රී ලංකා රජයේ අදායම් ඉලක්ක අභිබවමින් සියයට 6ක වර්ධනයක් ළඟා කර ගැනීමට හැකි වී ඇතැයි මුදල් රාජ්‍ය අමාත්‍ය රංජිත් සියඹලාපිටිය පවසනවා.
මෙම වසරේ පළමු කාර්තුව තුළ රුපියල් බිලියන 834ක රාජ්‍ය ආදායමක් උපයා ගැනීමට හැකි වී තිබෙන අතර ඒ හරහා අපේක්ෂිත රාජ්‍ය අදායම් ඉල්ලක්ක අභිබවා ගොස් ඇති බවයි ඔහු සඳහන් කළේ.
විධිමත් මූල්‍ය කළමනාකරණය සහ ආදායම් ලැබෙන රටාව අනුව සළකා බැලීමේදී 2024 වසර අදායම් ඉලක්ක සපුරාගත හැකි වසරක් වනු ඇති බව රාජ්‍ය අමාත්‍යවරයා සඳහන් කර තිබෙනවා.
මෙම වසරේ මුල් කාර්තුවේ රාජ්‍ය ආදායම ලෙස රුපියල් බිලියන 787ක් බලාපොරොත්තු වුව ද රුපියල් බිලියන 834ක් උපයා ගෙන ඇති බව අමාත්‍යවරයා ප්‍රකාශ කළා.
දේශීය ආදායම් දෙපාර්තමේන්තුව මෙම වසරේ මුල් කාර්තුව තුළ රුපියල් බිලියන 430ක්, රේගුව බිලියන 354කට ආසන්න අදායමක් මෙන්ම සුරාබදු දෙපාර්තමේන්තුව රුපියල් බිලියන 51ක පමණ අදායමක් උපයා දී ඇති බවයි ඔහු පෙන්වා දුන්නේ.
මේ ආකාරයට ආදායම් ලැබෙන රටාව අනුව සළකා බැලීමේදී 2024 වසර අදායම් ඉලක්ක සපුරාගත හැකි වසරක් වනු ඇති බව විශ්වාස කළ හැකි බව ද අමාත්‍ය රංජිත් සියඹලාපිටිය සඳහන් කර තිබෙනවා.
