වික්ටෝරියා ප්‍රාන්තයේ ළමා ශ්‍රමිකයින් යොදා ගන්නා වෙළඳසැල්වලට එරෙහිව නීතිය තදින්ම ක්‍රියාත්මක කරන බව ප්‍රාන්ත ආණ්ඩුව නිවේදනය කර තිබෙනවා.
එසේම අඩු වයස් දරුවන් රැකියා සඳහා යොමු කරන දෙමාපියන්ට ද නීතිය ක්‍රියාත්මක කරන බවයි ප්‍රාන්ත රජය පවසා ඇත්තේ.
වික්ටෝරියා ප්‍රාන්තයේ වෙළඳසැල් 80කට වැඩි ප්‍රමාණයක බලපත්‍ර නොමැතිව දරුවන් සේවයේ යොදවා ගෙන ඇතැයි පැවසෙන අතර එම වෙළඳසැල්වලට එරෙහි නීතිය තදින් ක්‍රියාත්මක වනු ඇති.
වැටලීම්වලදී මෙල්බර්න්හි නිරිතදිග ප්‍රදේශයේ වෙළඳසැලක බලපත්‍රයක් නොමැතිව වයස අවුරුදු 15ට අඩු දරුවෙකු සේවයේ යොදවා ඇති බව සොයාගෙන තිබුණා.
වහාම එම දරුවාගේ වැඩ නතර කළ යුතු බවට ව්‍යාපාරයට අනතුරු අඟවා තිබුණ ද එම වෙළඳසැළ විසින්ම පසුව තවත් දරුවෙකු බලපත්‍රයක් නොමැතිව සේවයේ යොදවා ඇති බවටයි හෙළිවී ඇත්තේ.
මෙලෙස අවස්ථා දෙකකදී ළමා ශ්‍රමිකයින් යොදවා ගැනීමේ චෝදනාව මත වෙළඳසැලට එරෙහිව නඩු පැවරීමට ප්‍රාන්ත රජය පියවර ගෙන තිබෙනවා.
ඒ අනුව වැරදි හතක් සම්බන්ධයෙන් අදාළ වෙළඳසැලට එරෙහි නඩු පවරා ඇති අතර ඉදිරියේ දී ප්‍රාන්තය පුරා වෙළඳසැල් ආවරණය වන පරිදි ළමා ශ්‍රමිකයින් පිළිබඳ සොයා බලන බවයි ප්‍රාන්ත රජය අවධාරණය කර ඇත්තේ.
