ඉරානය, ඊශ්‍රායලය සහ පලස්තීනයේ ගැටුම් පවතින ප්‍රදේශවල සිටින ඔස්ට්‍රේලියානුවන්ට රජය විසින් ආරක්‍ෂිත උපදෙස් නිකුත් කර තිබෙනවා.
ඊශ්‍රායලයේ සහ පලස්තීන ප්‍රදේශවල සිටින ඔස්ට්‍රේලියානුවන්ට විදේශ කටයුතු දෙපාර්තමේන්තුව දැනුම් දී ඇත්තේ අවදානමක් නොමැති නම් ආරක්ෂිතව ඉවත් වන ලෙසටයි.
ඊශ්‍රායලයට මෙන්ම කලාපය පුරා ත්‍රස්තවාදී ප්‍රහාරවල ඉහළ තර්ජනයක් පවතින බවයි දෙපාර්තමේන්තුව යාවත්කාලින කරන ලද සංචාරක උපදෙස්වල සඳහන් කර ඇත්තේ.
ඊශ්‍රායලයට යාම සම්බන්ධ තීරණ නැවත සලකා බලන ලෙස විදේශ කටයුතු දෙපාර්තමේන්තුව දැනටමත් ඔස්ට්‍රේලියානුවන්ට උපදෙස් දී ඇති අතර නැගෙනහිර ජෙරුසලමෙන් ඔබ්බට ගාසා තීරය හෝ බටහිර ඉවුර අසලින් ගමන් නොකරන ලෙසට අනතුරු අඟවා තිබෙනවා.
එමෙන්ම මිලිටරි ප්‍රහාර හමුවේ ගුවන් අවකාශය වසා දැමීම ඇතුළු බාධා ඇති කළ හැකි අතර ආරක්ෂක ගැටළු හේතුවෙන් ටෙල් අවිව්හි බෙන් ගුරියන් ජාත්‍යන්තර ගුවන් තොටුපළ ඕනෑම වේලාවක කෙටි දැනුම්දීමකින් මෙහෙයුම් නතර කළ හැකි බව ද රජය දැනුම් දෙනවා.
ඉරානය, ඉරාකය, සිරියාව, යේමනය සහ ලෙබනනයට ගමන් නොකරන ලෙසට වඩාත් ප්‍රබල අනතුරු ඇඟවීමක් ක්‍රියාත්මක අතර කලාපීය ආතතීන් ඉහළ මට්ටමක පවතින බැවින් ආරක්ෂක තත්ත්වය දැනුම් දීමකින් තොරව ඉක්මනින් වෙනස් විය හැකි බවයි පැවසෙන්නේ.
පූර්වාරක්ෂාව ලෙස ටෙල් අවිව්, ජෙරුසලම, රමල්ලා සහ ටෙහෙරාන් යන නගරවලින් පිටව නොයන ලෙස ඔස්ට්‍රේලියානු රජයේ නිලධාරීන්ට ද උපදෙස් දී තිබෙනවා.
පවතින තත්වය හමුවේ ඔස්ට්‍රේලියානු පුරවැසියන්ට සහ ස්ථිර පදිංචිකරුවන්ට විදේශ කටයුතු දෙපාර්තමේන්තුවේ ලියාපදිංචි කිරීමේ ද්වාරය හරහා තම පදිංචි ස්ථානය ලියාපදිංචි කර නිලධාරීන් සමඟ සම්බන්ධව සිටිය හැකියි.
