ආහාර සොයා පුන්‍යායතන වෙත පැමිණෙන ඔස්ට්‍රේලියානුවන් අතුරින් වැඩි පිරිසක් ආහාර සොයා ගැනීම සඳහා කසල බඳුන් වෙත ප්‍රවේශ වන බව නවතම අධ්‍යනයක දී හෙළිව තිබෙනවා.
මාස 12ක කාලයක් පුරා පුණ්‍යායතන සේවා වෙත ප්‍රවේශ වූ ඔස්ට්‍රේලියානුවන් 1500ක් යොදා ගනිමින් සැල්වේශන් ආමි විසිනුයි මෙම අධ්‍යනය සිදු කර ඇත්තේ.
සමීක්ෂණයට සහභාගි වූවන්ගෙන් සියයට 63ක් ආහාර වේල් මඟ හැර ඇති අතර තවත් සියයට 45ක් සඳහන් කර ඇත්තේ නිවාස කුලී ගෙවීමට හේතුවෙන් ආහාර වේල් මගහරින බවයි.
පර්යේෂණයට ප්‍රතිචාර දැක්වූවන්ගෙන් හතරෙන් එකකට වැඩි පිරිසකට කල් ඉකුත් වූ හෝ නරක් වූ ආහාර අනුභව කිරීමට හුරුව ඇති බව සඳහන්.
එසේම ඔවුන් අතුරින් සෑම විසි දෙනෙකුගෙන් එක් අයෙක් කසල බඳුන් තුළ වූ ආහාර අනුභවයට යොමුව ඇති බවයි වාර්තා වන්නේ.
සැල්වේශන් ආමිහි මේජර් වොරන් එලියට් පැවසුවේ මෙලෙස ඔස්ට්‍රේලියානුවන් කසල බඳුන් තුළ වූ ආහාර අනුභවයට යොමු වීම ඉතාමත් බැරූරුම් තත්වයක් බවයි.
තම දරුවන්ට අවශ්‍ය දෑ මිලදී ගැනීමට හැකි වන පරිදි ඇය බොහෝ විට ආහාර ගැනීම මඟහරින බව සමීක්ෂණයට සහභාගී වූ 33 හැවිරිදි මවක් ප්‍රකාශ කළා.
ප්‍රචණ්ඩත්වයට ගොදුරු වීමෙන් පසු උපකාර පතන කාන්තාවන් සහ ළමුන්ගේ සංඛ්‍යාවේ සියයට 35 ක වැඩිවීමක් පෙන්වන බව ද එම වාර්තා වැඩිදුරටත් පෙන්වා දෙනවා.
