ප්‍රවීණ ගායන ශිල්පී රෝහණ බැද්දගේ ශුරීන්ගේ අලුත් අවුරුදු ගීතයක් විකෘත කිරීමේ චෝදනා මත සුරාබදු නිලධාරියෙකු පොලිස් අත්අඩංගුවට ගෙන තිබෙනවා.
අවුරුදු සමයේ නිරන්තරයෙන් විකාශය වන, රෝහණ බැද්දගේ සමග රන්වල බළකාය ගායනා කරන ‘සූරිය මංගල්ලේ’ ගීතය එලෙස විකෘති කර සමාජ මාධ්‍ය හරහා ප්‍රචාරය කර ඇති බවටයි පොලිස්පතිවරයා වෙත පැමිණිලි ලැබී තිබුණේ.
එම පැමිණිල්ලකට අදාළව පරිගණක අපරාධ විමර්ශන කොට්ඨාසයේ වයඹ පළාත් ඒකකය විසින් විමර්ශනයක් ආරම්භ කර තිබුණා.
ඒ අනුව ඊයේ (16) වාරියපොළ ප්‍රදේශයේදී එම සිදුවීම සම්බන්ධයෙන් සැකපිට අවුරුදු 31ක් වූ තලාතුඔය ප්‍රදේශයේ පදිංචි සුරාබදු නිලධාරියෙක් අත්අඩංගුවට ගෙන තිබෙනවා.
සැකකරු අද (17) අධිකරණයට ඉදිරිපත් කිරීමට නියමිත අතර සිද්ධිය සම්බන්ධයෙන් පරිගණක අපරාධ විමර්ශන කොට්ඨාසයේ වයඹ පළාත් ඒකකය මඟින් වැඩිදුර විමර්ශන සිදු කරන බව සඳහන්.
