උතුරු ගාසා තීරයේ බෙයිට් ලාහියා අසල මුහුදට වැටී තිබූ සහනාධාර පාර්සල් වෙත ලබා ගැනීමට උත්සාහ කිරීමේදී පලස්තීන ජාතිකයන් 12 දෙනෙකු දියේ ගිලී මිය ගොස් තිබෙනවා.
ගුවන් මගින් ලබාගෙන ඇති දර්ශනවල දැක්වෙන්නේ සිය ගණනක් පලස්තීනුවන් ආධාර වැටෙන ස්ථානයට වේගයෙන් දිව යන අතර ඇතැමුන් මුහුදට වැටෙන පාර්සල් ලබා ගැනීමට උත්සාහ කරන බවයි.
අධික කුසගින්නෙන් පෙළෙමින් සිටි පිහිනීමට හෝ නොදන්නා පිරිසක් මෙලෙස ආධාර පාර්සල් ලබා ගැනීමට යාමේදී අනතුරට ලක්වූ බවයි සිද්ධිය ඇසින් දුටුවන් ප්‍රකාශ කර ඇත්තේ.
පසුගියදා ගාසා නගරයට බටහිර දෙසින් පිහිටි අල් ෂාති කඳවුරේ දී ගුවන් යානා ආධාර පැකේජ වැටීමෙන් පුද්ගලයින් පස් දෙනෙකු මිය ගොස් තවත් 10 දෙනෙකු තුවාල ලබා තිබුණා.
එක්සත් ජාතීන්ගේ වාර්තා පෙන්වා දෙන්නේ ගාසා තීරයට ඇතුළුවීම සඳහා ඊශ්‍රායලය පනවා ඇති සීමා හේතුවෙන් අත්‍යවශ්‍ය සැපයුම්වලට බාධා මතුවී ඇති අතර මිලියන 2.2කට අධික ජනතාවක් සාගතයේ අවදානමට ලක්ව සිටින බවයි.
