දකුණු මෙල්බර්න් හි ඓතිහාසික චීන විහාරස්ථානයක ඇති වූ ගින්නකින් ඊට දැඩි අලාභ හානි සිදුව තිබෙනවා.
සෙනසුරාදා රාත්‍රී 8 ට පමණ ගොඩනැගිල්ලේ ඉහළ මහලක ගින්න හටගෙන ඇති අතර අනතුරුව ගිනි නිවන භටයින් කැඳවා ඇති බවයි වාර්තා වූයේ.
වසර 150 ක් පැරණි මෙම චීන විහාරස්ථානයේ ගින්න පාලනයට ගිනි නිවන භටයින් 30 දෙනෙකුට විනාඩි 45ක පමණ කාලයක් ගත වී තිබෙනවා.
ගිනි නිවන භට කණ්ඩායමේ අණදෙන නිලධාරී මිච් සයිමන්ස් පැවසුවේ ගොඩනැගිල්ලේ අභ්‍යන්තරයට විශාල හානියක් සිදුව ඇති බවයි.
ඇතුළත ඉතා අලංකාර දැව නිර්මාණ රැසක් ඇති මෙම විහාරස්ථානයේ ප්‍රධාන කොටස ගින්නෙන් හා දුමෙන් මෙන්ම ජලයෙන් ද දැඩි ලෙස හානි වී තිබෙනවා.
ගින්න ඇති වන විට විහාරස්ථානයේ අභ්‍යන්තරයේ කිසිවෙකුත් සිට නොමැති අතර කිසිවකුට අනතුරක් සිදුවීමක් වාර්තා වී නැහැ.
රසායන විද්‍යාඥයින් විසින් ගොඩනැගිල්ල පරීක්ෂා කිරීමට නියමිත අතර ගින්න පිළිබඳ තොරතුරු දන්නා ඕනෑම අයෙකුට තොරතුරු දැනුම් දෙන ලෙසටයි වික්ටෝරියා පොලිසිය ඉල්ලා ඇත්තේ.
පෞරාණික විහාරස්ථානය 1866 දී ඉදිකරන ලද අතර එය ඔස්ට්‍රේලියාවේ තවමත් භාවිත කෙරෙන පැරණිතම චීන බෞද්ධ විහාරය ලෙසටයි සැලකෙන්නේ.
එය ඓතිහාසික හා වාස්තුවිද්‍යාත්මක වැදගත්කමක් ඇති ගොඩනැගිල්ලක් ලෙස 1978 දී ලෝක උරුම ලැයිස්තුවට ද ඇතුලත් කෙරුණා.
