මැටිල්ඩාස් ලෙසින් හැඳින්වෙන ඔස්ට්‍රේලියානු කාන්තා පාපන්දු කණ්ඩායම විසින් මේ දිනවල පැවැත්වෙන ලෝක කුසලානයේ මේ දක්වා කාලය තුළදී පමණක් ඩොලර් බිලියන 7.6 ක මුදලක් ඔස්ට්‍රේලියා ආර්ථිකයට ලබාදී ඇති බවට අනාවරණය වී තිබෙනවා.
තරග ප්‍රවේශ පත්‍ර ආදායම මෙන්ම ඒ හා සම්බන්ධ අනෙකුත් සිල්ලර අලෙවි කිරීම් හරහායි මෙම ආදායම උපයා ඇත්තේ.
අද රාත්‍රියේ පැවැත්වෙන ප්‍රංශ කණ්ඩායමට එරෙහි තරගයෙන් ජය ලබා අවසන් පූර්ව වටයට සුදුසුකම් ලැබුවහොත් මෙම මුදල තවත් ඉහළ යනු ඇති බවටද පුරෝකථනය කර තිබෙනවා.
මෙම ඩොලර් බිලියන 7.6 න් ඩොලර් බිලියන 4.53 ක් ම තරග නැරඹීම සඳහා පැමිණි විදේශිකයන්ගෙන් ලැබුණු විදේශ විනිමය බවයි පැවසෙන්නේ.
තරග පැවැත්වෙන ක්‍රීඩාංගණ ආසන්නයේ පිහිටා ඇති හෝටල්වල කාමර සියල්ලම පාහේ වෙන් කරවාගෙන අවසන් බවටද අනාවරණය වී තිබෙනවා.
ප්‍රාන්ත වශයෙන් සැළකීමේදී වැඩිම ආදායමක් උපයා ඇත්තේ නිවු සවුත් වේල්ස් ප්‍රාන්තය විසින් වන අතර එය ඩොලර් බිලියන 3 කට ආසන්නයි.
වික්ටෝරියා ප්‍රාන්තය ඩොලර් බිලින 2.3 ක් / ක්වීන්ස්ලන්ඩ් ඩොලර් බිලියන 1.55 ක් / බටහිර ඔස්ට්‍රේලියාව ඩොලර් මිලියන 663.2 ක් සහ දකුණු ඔස්ට්‍රේලියාව ඩොලර් මිලියන 161 ක් උපයාගෙන ඇති බව සඳහන්.
