සිඩ්නි හි ස්ටාර් කැසිනෝ මධ්‍යස්ථානය සඳහා ඩොලර් මිලියන ගණනක දැවැන්ත බදු සහනයක් ලබාදීමට නිවු සවුත් වේල්ස් ප්‍රාන්ත රජය තීරණය කර තිබෙනවා.
ඒ අනුව පැවති ලිබරල් සන්ධාන රජය විසින් පණවන ලද විශාල බද්දක් ඉවත් කෙරෙන බවයි ලේබර් පක්ෂ රජය දන්වා සිටින්නේ.
අධික බදු මුදලක් ගෙවීමට සිදුවුවහොත් ඇතැම්විට ස්ටාර් කැසිනෝ ආයතනය වසා දැමීමට පවා සිදුවනු ඇති බවත් එසේ වුවහොත් රැකියා දහස් ගණනක් අහිමිවනු ඇත බවට උපකල්පනය කර මෙම සහනය ලබාදෙන බවත් ප්‍රාන්ත රජය සඳහන් කරනවා.
පැවති රජය විසින් අදාළ බද්ද පණවා ඇත්තේ කිසිදු අදහස් විමසීමකින් තොරව බවටයි චෝදනා එල්ල වන්නේ.
කිසියම් අයුරකින් එය ක්‍රියාත්මක වූයේ නම් ඉදිරි වසර 04 තුළදී සිඩ්නි ස්ටාර් කැසිනෝ ආයතනයට ගෙවීමට නියමිත වු බදු මුදල ඩොලර් මිලියන 364 ක්.
මෙම බදු සහනය වෙනුවෙන් සේවා ගුණාත්මකභාවය ඉහළ නැංවිය යුතු කොන්දේසි ගණනාවක් ස්ටාර් කැසිනෝ ආයතනය විසින් සම්පූර්ණ කල යුතු වනවා.
