ෆේස්බුක් හරහා සිදුකරන බිත්තර ජාවාරමක් සම්බන්ධයෙන් ඔස්ට්‍රේලියානුවන්ට අනතුරු ඇගවෙනවා.
කිකිළි – තාරා සහ පාත්ත බිත්තර ඉතා අඩු මුදළකට මිලදී ගත හැකි බවටත් අවසාන බිත්තර තොගය පමණක් ඉතිරිව ඇති බවටත් ෆේස්බුක් හරහා දැන්වීම් පළකිරීමයි පළමුවෙන් සිදුවන්නේ.
එය තහවුරු කිරීම සඳහා අදාළ ගොවිපළවල ඡායාරූප පවා පළකර ඇති බව සඳහන්.
ඊට ප්‍රතිචාර දක්වන පුද්ගලයන්ට පුද්ගලික පණිවිඩයක් හරහා මුදල් ගෙවිය හැකි PayPal ගිණුමක් පිළිබඳ තොරතුරු ලබාදීම අනතුරුව සිදුවන අතර මුදල් ගෙවූ බව දැක්වෙන තහවුරු කිරීමක්ද ඔවුන් වෙත යැවිය යුතුයි.
කෙසේවෙතත් ඉන්පසු අදාළ ෆේස්බුක් දැන්වීම ඉවත් කර ගැනෙන අතර ඇතැම්විට මෙම වංචාව සිදුකරන තැනැත්තන්ගේ ෆේස්බුක් ගිණුම් අක්‍රීය කර ඇති ආකාරයක්ද දැකගත හැකියි.
මුදල් ගෙවන පුද්ගලයා ඔවුන්ගේ කැමැත්තෙන් මුදල් ගෙවන බැවින් මේ සම්බන්ධයෙන් තමන්ටද කල හැකි යමක් නොමැති බවයි PayPal ආයතනයද අවධාරණය කර ඇත්තේ.
