දුරකථන හෝ අන්තර්ජාල බිල්පත් ගෙවීමට අපහසු ග්‍රාහකයන් වෙනුවෙන් සහනයක් සැපයීමට අපොහොසත් වන්නේ නම් ඉහළ දඩ පණවන බවට ඔස්ට්‍රේලියානු සන්නිවේදන සහ මාධ්‍ය අධිකාරිය සන්නිවේදන සමාගම් 08 කට අනතුරු අගවා තිබෙනවා.
ප්‍රධාන පෙළේ සන්නිවේදන සමාගම් වන ඔප්ටස් – ටෙල්ස්ට්‍රා – TPG ඇතුලු සන්නිවේදන සමාගම් මේ අතර වනවා.
ගෙවීම් ප්‍රමාදයන් පවතින පාරිභෝගිකයන්ගේ සබඳතා විසන්ධි කිරීමත් – ඊට පෙර සිදු කර ඇති පූර්ව නිවේදන දින කිහිපයකට පෙර පමණක් ලබාදීමත් වැනි පැමිණිලි සළකා බැලීමෙන් අනතුරුවයි මෙම අනතුරු ඇගවීම සිදුකර ඇත්තේ.
සිය නිර්දේශ කඩ කරන්නේ නම් ඩොලර් 250,000 ක් වැනි ඉහළ දඩයක් පණවන බවට මාධ්‍ය අධිකාරිය විසින් අදාළ සන්නිවේදන සමාගම් 08 ට දන්වා තිබෙනවා.
දුරකථන හෝ අන්තර්ජාල සබඳතා විසන්ධි කිරීම් හමුවේ පාරිභෝගිකයන්ට බැංකු – කාර්යාල – අධ්‍යාපන – සෞඛ්‍ය වැනි සේවා රැසක් ඉටුකර ගැනීමට නොහැකි වන බව ඔස්ට්‍රේලියානු සන්නිවේදන සහ මාධ්‍ය අධිකාරිය පෙන්වා දෙනවා.
