ගතවූ මාස 06 තුළදී ඔස්ට්‍රේලියානුවන් 26,000 කට වැඩි පිරිසක් ශ්‍රී ලංකාවේ සංචාරය සඳහා පිටත්ව ගොස් තිබෙනවා.
එය අර්බුදකාරී වාතාවරණයෙන් පසු සටහන් වූ ඉහළම අගයක් බවයි මෙල්බන් හි කොන්සල් ජනරාල් සන්දිත් සමරසිංහ සඳහන් කලේ.
ඔහු මේ බව කියාසිටියේ ශ්‍රී ලංකාවේ සංචාරක ව්‍යාපාරය නගා සිටුවීම සඳහා ඊයේ පස්වරුවේ මෙල්බන් හි පැවති Visit Sri Lanka විශේෂ වැඩසටහනට එක්වෙමිනුයි.
ශ්‍රී ලංකාවේ ආර්ථික අර්බුදය දිනෙන් දින පහවයන බැවින් ඉදිරියේදී තවත් විශාල සංචාරකයන් පිරිසක් රටට පැමිණෙනු ඇතැයි අපේක්ෂා කරන බවද කොන්සල් ජනරාල්වරයා අවධාරණය කලා.
මෙම අවස්ථාවට එක්වූ සංචාරක හා ඉඩම් අමාත්‍ය හරීන් ප්‍රනාන්දු කියාසිටියේ මේ වනවිට ජාත්‍යන්තර ගුවන් සමාගම් රැසක් ශ්‍රී ලංකාව වෙත නැවත ගුවන් ගමන් ආරම්භ කර ඇති බවයි.
තවත් මාස කිහිපයකින් ආරම්භ වන අමෙරිකා – යුරෝපා ශීත සෘතුවේදී ඉහළ සංචාරකයන් සංඛ්‍යාවක් ශ්‍රී ලංකාවට පැමිණෙනු ඇතැයි බලාපොරොත්තු වන බවටද අමාත්‍යවරයා අනාවැකි පළකලා.
ඔස්ට්‍රේලියාවේ ශ්‍රී ලංකා මහ කොමසාරිස් කාර්යාලය – මෙල්බන් කොන්සල් කාර්යාලය ඇතුලු පාර්ශව කිහිපයක් එක්ව සංවිධාන කල මෙම සංචාරක ප්‍රවර්ධන වැඩසටහනට විශාල පිරිසක් සහභාගී වී සිටීම විශේෂත්වයක්.
ඔස්ට්‍රේලියානු සංචාරක නියෝජිත ආයතන ඇතුලු ක්ෂේත්‍රයට සම්බන්ධ බොහෝ පිරිසක් ඒ අතර වුණා.
