ශ්‍රී ලංකන් ගුවන් සමාගම කඩිනමින් ප්‍රතිව්‍යූහගතකරණය නොකළ හොත් එම සමාගමේ සේවකයන් 6,000 කගේ පමණ රැකියා අහිමි වීමේ අවදානමක් පවතින බව විෂය භාර ඇමති නිමල් සිරිපාල ද සිල්වා පවසනවා.
දිගින් දිගටම අලාභ ලබන ශ්‍රී ලංකන් ගුවන් සමාගම නඩත්තු කිරීම රජයට අඛණ්ඩව සිදු කළ නොහැකි බවයි ඔහු කියාසිටියේ.
එබැවින් ශ්‍රී ලංකන් ගුවන් සමාගම ප්‍රතිව්‍යූහගතකරණයට අදාළ කටයුතු සිදු කිරීමට අන්තර්ජාතික මූල්‍ය විශේෂඥයන්ගේ සහාය ගැනීමට මේ වන විටත් පියවර ගෙන ඇති බවත් ඇමැතිවරයා සඳහන් කලා.
එමිරේට්ස් ගුවන් සේවාව විසින් ශ්‍රී ලංකන් ගුවන් සේවාව පාලනය කරන සමයේ උපයන ලද රුපියල් මිලියන 30 ක ලාභය හැරුණුවිට කිසිදු ලාභයක් උපයාගැනීමට මෙතෙක් ශ්‍රී ලංකන් ගුවන් සේවය සමත් වී නොමැති බවයි ඔහු අනාවරණය කලේ.
අද වන විට ශ්‍රි ලංකන් ගුවන් සමාගම ඇමරිකානු ඩොලර් බිලියන 1.2 ක් ණය වී ඇතැයිද මෙහිදී අනාවරණය කෙරුණා.
එබැවින් රජය යටතේ 51% ක කොටස් තබාගෙන 49%ක කොටස් වෙනත් ආයෝජකයකුට ලබා දීමටයි රජය තීරණය කර ඇත්තේ.
