2023 වසරේදී ඔස්ට්‍රේලියානුවන්ට වංචා හේතුවෙන් ඩොලර් බිලියන 2.7ක් අහිමි වී ඇති බව පාරිභෝගික නිරීක්ෂණ ආයතනයේ නවතම වාර්තාවක් මගින් හෙළි කර තිබෙනවා.
ඔස්ට්‍රේලියානුවන් පසුගිය වසරේ වංචා 600,000කට වඩා වැඩි ප්‍රමාණයකට හසුවී ඇති ඇති අතර එමගින් සමස්තයක් ලෙස ඩොලර් බිලියන 2.7ක් අහිමි වී ඇති බවයි වාර්තාවල දැක්වෙන්නේ.
මෙවැනි වංචාවලින් වැඩිම පාඩු ලබා ඇත්තේ වැඩිහිටි පුද්ගලයින් වන අතර සමාජ මාධ්‍ය මගින් සිදු වන වංචාවල කැපී පෙනෙන වර්ධනයක් ඇති බව ඔස්ට්‍රේලියා පාරිභෝගික නිරීක්ෂණ ආයතන වාර්තාව පෙන්වා දෙනවා.
2022 වසරේදී වාර්තා වූ වංචා 507,000 සිට 2023 වන විට වංචා පිළිබඳ වාර්තා 601,000 කට වඩා වැඩි ප්‍රමාණයක් ලැබී ඇතැයි සඳහන්.
මෙම වංචා අතර ආයෝජන වංචා වැඩි වශයෙන් පවතින අතර එමඟින් ඔස්ට්‍රේලියානුවන්ට ඩොලර් බිලියන 1.3කට වඩා පාඩු සිදු වී ඇති බව වාර්තාව ප්‍රකාශ කළා.
වයස අවුරුදු 65ට වැඩි පුද්ගලයින් අනෙක් වයස් කාණ්ඩවල අයට වඩා මුදල් අහිමි කර ගැනීමේ සම්භාවිතාව වැඩි අතර 2022ට වඩා 2023 දී වැඩි මුදලක් අහිමි වූ එකම වයස් කාණ්ඩය ද එයයි.
පාරිභෝගික නිරීක්ෂණ ආයතනයේ නියෝජ්‍ය සභාපති කැට්‍රියෝනා ලෝ පැවසුවේ වංචාකරුවන්, ආයෝජන අවස්ථා සොයන විශ්‍රාම ඉතුරුම් සහිත වැඩිහිටි ඔස්ට්‍රේලියානුවන් වැඩි වශයෙන් ඉලක්ක කර ගන්නා බවයි.
මෙවැනි වංචා සහ මුල්‍යමය පාඩු ඉතා ඉහළ මට්ටමක පවතින අතර වංචාකරුවන්ගේ ක්‍රියාකාරකම් පිළිබඳ අවධානයෙන් සිටින ලෙසට සහ සැක කටයුතු ක්‍රියාකාරකම් පිළිබඳ දැනුම් දෙන ලෙසටයි ඉල්ලීමක් කෙරෙන්නේ.
