සිය චීන නිල සංචාරය සඳහා ඩොලර් 80,000 කට වැඩි මුදලක් වියදම් කර ඇති බවට වික්ටෝරියා ප්‍රාන්ත අගමැති ඩැනියල් ඇන්ඩෲස් ට චෝදනා එල්ල වනවා.
අද අනාවරණය කෙරුණු ඔහුගේ සංචාරක වියදම් වාර්තාවේ දැක්වෙන්නේ පසුගිය මාර්තු මාසයේ සිදුකල අදාළ සංචාරයට ඩොලර් 82,714 ක මුදලක් වැය කර ඇති බවයි.
ඔහුට සහ තවත් නිළධාරීන් දෙදෙනෙකුට චීනයට ගොස් නැවත පැමිණිමට ගුවන් ගාස්තු ලෙස ඩොලර් 61,813 ක මුදලක් එහිදී වියදම් වී තිබෙනවා.
නවාතැන් පහසුකම් වෙනුවෙන් ඩොලර් 14,933 ක් මෙන්ම වෙනත් වියදම් ලෙස ඩොලර් 5,968 ක් වැයවී ඇති බවයි එහි දැක්වෙන්නේ.
කෙසේවෙතත් දින 04 ක සංචාරයක් සඳහා මෙතරම් මුදලක් වැය කිරීම ගැටලු සහගත බවටයි චෝදනා එල්ල වන්නේ.
එහෙත් ප්‍රාන්ත අගමැතිවරයා අවධාරණය කරන්නේ සිය චීන නිල සංචාරයෙන් වික්ටෝරියා ප්‍රාන්තයට ආර්ථික වාසි රැසක් අත්කර ගැනීමට හැකිවූ බවයි.
