ලබන 09 වන අගහරුවාදා ඉදිරිපත් කිරීමට නියමිත ෆෙඩරල් අයවැයේදී වැඩිම අවධානයක් යොමු කෙරෙනුයේ ජීවන වියදම පාලනයට බව භාණ්ඩාගාරික අමාත්‍ය ජිම් චාමර්ස් පවසනවා.
දේශීය මෙන්ම විදේශීය සාධකවල බලපෑම හමුවේ අත්‍යවශ්‍ය ආහාර ද්‍රව්‍ය – ඉන්ධන සහ නිවාස කුළී ගාස්තු අවම කිරීමට විධිමත් වැඩපිළිවෙලක් සකස් කරන ලෙසටයි ෆෙඩරල් රජයට දිගින් දිගටම ඉල්ලීම් ඉදිරිපත් වන්නේ.
මේ අතර අයවැයට ඇතුළත් වනු ඇති බවට අනාවැකි පළවන සංශෝධන කිහිපයක් පිළිබඳවද වාර්තා පළවී තිබෙනවා.
ඒ අනුව ඉහළ ආදායම් ලබන්නන්ගෙන් අය කෙරෙන බදු ප්‍රතිශත අගයන් ඉහළ දැමෙනු ඇති බවටයි අනාවැකි පළවන්නේ.
සුපර් ඇනයුෂන් අරමුදලේ ශේෂය ඩොලර් මිලියන 03 ට වැඩි පුද්ගලයන්ගෙන් අය කෙරෙන බදු ප්‍රතිශතය සියයට 15 සිට 30 දක්වා වැඩි කරන බව ෆෙඩරල් රජය දැනටමත් ප්‍රකාශයට පත් කර අවසන්.
2025 වසරේ සිට බලාත්මක වන එය ඔස්ට්‍රේලියානුවන් 80,000 කට පමණ බලපානු ඇති බව සඳහන්.
බලශක්ති ගාස්තු – ඖෂධ මිළ අඩු කිරීම මෙන්ම ආරක්ෂාව සඳහා අමතර ප්‍රතිපාදන වෙන් කිරීමද මෙවර අයවැයට ඇතුළත් වනු ඇති බවටයි අනාවැකි පළවන්නේ.
