ලැටිටියුඩ් ෆයිනෑන්ෂල් සමාගමේ දත්ත වංචාවේදී දත්ත පැහැර ගැනීමට ලක්වූ පාරිභෝගිකයන් ලක්ෂ 79 කට පමණ එම සමාගමට එරෙහිව නඩු පැවරීමට අවස්ථාවක් ලැබී තිබෙනවා.
ණය – ක්‍රෙඩිට් කාඩ් සහ රක්ෂණාවරණ සපයන මූල්‍ය සමාගමක් වන එහි ඔස්ට්‍රේලියාවේ සහ නවසීලන්තයේ සිටින පාරිභෝගිකයන් විශාල පිරිසකගේ රියදුරු බලපත් අංක අනවසර පිවිසීමකට ලක්ව ඇති බවයි ඔවුන් පසුගිය සතියේදී නිවේදනය කලේ.
මෙම පාරිභෝගිකයන් අතුරින් සියයට 60 ක් පමණ සිය පුද්ගලික තොරතුරු ලැටිටියුඩ් ෆයිනෑන්ෂල් සමාගම වෙත ලබාදී ඇත්තේ මීට වසරකට පමණ ඉහතදී බවද සඳහන්.
රියදුරු බලපත්වලට අමතරව පුද්ගල නාම – ලිපින – දුරකථන අංක – උපන්දින මෙන්ම විදෙස් ගමන් බලපත් අංක 53,000 කට වැඩි සංඛ්‍යාවක්ද අනවසර පිවිසීම්වලට ලක්වී තිබෙනවා.
ලැටිටියුඩ් ෆයිනෑන්ෂල් සමාගමට එල්ලවූ සයිබර් ප්‍රහාරය සම්බන්ධයෙන් ෆෙඩරල් පොලිසිය මෙන්ම ඔස්ට්‍රේලියානු සයිබර් ආරක්ෂණ මධ්‍යස්ථානයද මේ වනවිට විමර්ශන ආරම්භ කර තිබෙනවා.
