මෙල්බන්හි ශ්‍රී ලාංකික නර්තන ඉතිහාසයේ නව පිටුවක් පෙරළමින් රංගන – උදුම්බරා නර්තන කණ්ඩායමේ 02 වන කළඑළි මංගල්‍යය හෙට පැවැත්වෙනවා.
හෙට පෙරවරු 08.30 ට කීස්බරෝ ධම්ම සරණ විහාරස්ථානයේදී චාරිත්‍රානුකූල වතාවත් සිදුකරමින් මෙම උත්සවය පැවැත්වෙනු ඇති.
රංගන – උදුම්බරා නර්තන කණ්ඩායම මෙල්බන් හි ස්ථාපිත කර මේ වනවිට වසර 20 ක කාලයක් ගතවන අතර මෙරට පළමු කළඑළි මංගල්‍යය 2014 වසරේදී පවත්වා තිබුණා.
එහිදී දියණිවරුන් 10 ක් සිය නර්තන හැකියාවන් ලොවට විවරකල අතර හෙට දිනයේදී දියණියන් 08 දෙනෙකු සහ එක් පුත්‍රයෙකු කළඑළි මංගල්‍යයට සහභාගී වනවා.
රංගන – උදුම්බරා නර්තන කණ්ඩායමේ නිර්මාතෘ රංගන රත්නතුංග සහ උදුම්බරා රත්නතුංග ගේ දියණියක සහ පුතණුවෙකුද ඒ අතර වීම විශේෂත්වයක්.
වසර 15 කට අධික කාලයක් පුහුණුව ලත් නර්තන ශිල්පිනියන් පිරිසක්ද හෙට දිනයේදී කළඑළි බැසීමට සූදානමින් පසුවනවා.
මෙවර කළඑළි මංගල්‍යය පෙර වසරවලට වඩා විශේෂත්වයක් ගෙන තිබෙනවා.
ශ්‍රී ලංකාවේ සෞන්දර්ය විශ්ව විද්‍යාලයේ ආචාර්යවරුන් 03 දෙනෙකුගේ දායකත්වයද ලැබී තිබීම ඊට හේතුවයි.
මේ අතර හෙට දිනයේදී කළඑළි බසින නර්තන ශිල්පි – ශිල්පිනියන් වේදිකාවක් මත ඔවුන්ගේ දක්ෂතා දක්වන රංගාභිෂේක උත්සවය ලබන 25 වනදා පස්වරු 06 ට මෙල්බන් බීසන් ශාලාවේදි පැවැත්වීමට නියමිතයි.
