පන්දුවාර 20 ලෝක කුසලානයේ නෙදර්ලන්තයට එරෙහි තරගයේ කාසියේ වාසිය දිනාගත් ශ්‍රී ලංකාව මුලින් පන්දුවට පහරදීමට තීරණය කරයි.
Geelong හිදී මෙල්බන් වේලාවෙන් පස්වරු 03 ට හෙවත් ශ්‍රී ලංකාවේ වේලාවෙන් පෙරවරු 09.30 ට එය ආරම්භ වනු ඇති.
සුපිරි 12 දෙනාගේ වටයට පිවිසීමට මෙම තරගය ජය ගැනීම කණ්ඩායම් 02 ටම වැදගත් වනවා.
මෙතෙක් සහභාගී වු තරග 02 ම ජයගත් නෙදර්ලන්තය A කාණ්ඩයේ ප්‍රසාද ළකුණු සටහනට අනුව පළමු ස්ථානයේ පසුවන අතර තරග 02 න් එකක් ජයගත් ශ්‍රී ලංකාව පසුවන්නේ 03 වන ස්ථානයේයි.
මෙම තරගය මෙන්ම අද පැවැත්වෙන අනෙක් තරගය වන නැමීබියාව සහ එක්සත් අරාබි එමීර් රාජ්‍යය අතර තරගයේද ප්‍රථීඵල මත A කාණ්ඩයෙන් සුපිරි 12 වටයට සුදුසුකම් ලබාගන්නා කණ්ඩායම් 02 තෝරා ගැනීමට නියමිතයි.
20යි 20 ලෝක කුසලාන ක්‍රිකට් තරගාවලියේ පළමු වටයේ A කාණ්ඩයේ මේ වනවිට ශ්‍රී ලංකාව තුන්වන ස්ථානයේ පසුවෙයි.
මේ දක්වා පැවති තරගවල ප්‍රතිඵල අනුව නෙදර්ලන්තය ප්‍රසාද ලකුණු සටහනේ පෙරමුණ ගෙන සිටී.
ඒ හේතුවෙන් සුපිරි 12 දෙනාගේ වටයට සුදුසුකම් ලබාගැනීමට නම් ශ්‍රී ලංකා කණ්ඩායම නෙදර්ලන්තය සමග පැවැත්වෙන තරගය අනිවාර්යෙන් ජයගත යුතුව ඇත.
තරගයට වර්ෂාවෙන් බාධා එල්ල වුවහොත් නැමීබියාව සහ එක්සත් අරාබි එමීර් රාජ්‍ය අතර පැවැත්වෙන අනෙක් තරගයේ ප්‍රතිඵලය මත ශ්‍රී ලංකාවේ ඉදිරි ගමන තීරණය වනු ඇති බව විචාරක මතයයි.
ඒ අනුව ශ්‍රී ලංකාවේ ලෝක කුසලාන ඉදිරි ගමන තීරණය කිරීමට වර්ෂාව ප්‍රධාන සාධකයක් බවට පත්ව තිබේ.
මෙවැනි තත්ත්වයක් මත Geelong කාලගුණ අනාවැකිය පිළිබඳව කාලගුණවිද්‍යා කාර්යාංශය පවසන්නේ අද Geelong නගරය ආශ්‍රිතව වර්ෂාව පතිත වීමේ සම්භාවිතාව ඉතා අඩු මට්ටමක පවතින බවය.
ඒ අනුව Geelong නගරයට අද දිනයේ වර්ෂාව පතිතවීමේ සම්භාවිතාව පවතින්නේ සියයට 5ක පමණ ඉතා අඩු අගයකය.
