වික්ටෝරියා හෙද සිසුන්ට නොමිළයේ පාඨමාලා හදාරන්න වරම්

වික්ටෝරියා ප්‍රාන්තයේ හෙද සහ midwifery අංශයෙන් උපාධිය හදාරන සිසුන් 10,000 කට පමණ නොමිළයේ අධ්‍යාපනය හැදැරීමේ අවස්ථාවක් උදාවී තිබෙනවා.

ඒ ප්‍රාන්ත රජය විසින් හඳුන්වාදීමට යෝජිත ඩොලර් මිලියන 270 ක නව සෞඛ්‍ය වැඩපිළිවෙල යටතේයි.

මේ අනුව හෙදියන් සහ වින්නඹු මාතාවන් 17,000 ක් පුහුණුකර සෞඛ්‍ය පද්ධතියට එක් කිරීමටයි සැළසුම් කර ඇත්තේ.

වික්ටෝරියා ප්‍රාන්ත අගමැති ඩැනියල් ඇන්ඩෲස් සඳහන් කලේ 2023 – 2024 අධ්‍යයන වර්ෂය සඳහා හෙද හෝ midwifery පාඨමාලාවක් සඳහා වික්ටෝරියා ප්‍රාන්තයේ ඕනෑම අධ්‍යාපන ආයතනයකට ඇතුලුවන දේශීය සිසුන්ට පාඨමාලා ගාස්තු ආවරණය කරගත හැකි පරිදි ශිෂ්‍යත්වයක් ලබාදීමට සැළසුම් කර ඇති බවයි.

ඒ අනුව වසර 05 කදී සිසුවෙකුට ඩොලර් 9,000 ක මුදලක් හිමිවන අතර වික්ටෝරියා මහජන සෞඛ්‍ය සේවයේ රාජකාරි කරන්නේ නම් තවත් ඩොලර් 7,500 ක මුදලක්ද ඔවුන්ට හිමිවනු ඇති.

මීට අමතරව පශ්චාත් උපාධි පාඨමාලාවක් හදාරන හෙද සිසුවෙකුට ඩොලර් 10,000 ක ශිෂ්‍යත්වයක් පිරිනැමීමටද වික්ටෝරියා ප්‍රාන්ත රජය තීරණය කර තිබෙනවා.

හෙදියක බවට පත්වීම සඳහා මීට වඩා සුදුසු වෙනත් කාලයක් උදාවී නොමැති බවද අගමැතිවරයා පෙන්වා දෙනවා.