ශ්‍රී ලංකාවේ ඒක පුද්ගල ණය ප්‍රමාණය මේ වනවිට රුපියල් මිලියනයේ සීමාව ඉක්මවා ගොස් තිබෙනවා.
ශ්‍රී ලංකා මහ බැංකුව පවසන පරිදි 2022 වසරේ අප්‍රේල් මාසය වනවිට මධ්‍යම රජය ගෙවීමට ඇති සමස්ත ණය ප්‍රමාණය මාස 4ක් ඇතුළත සියයට 32ක ප්‍රතිශතයකින් ඉහළයෑම ඊට හේතුවයි.
ශ්‍රී ලංකා මහ බැංකුවේ දත්තවලට අනුව 2022 අප්‍රේල් මාසය වනවිට මධ්‍යම රජය ගෙවීමට ඇති සමස්ත ණය ප්‍රමාණය රුපියල් බිලියන 23,310 ක්.
ඉන් රුපියල් බිලියන 12,442 ක් දේශීය ණය වන අතර විදේශීය ණය රුපියල් බිලියන 10,867 ක් බව සඳහන්.
2021 වසර අවසානයේ දී රුපියල් බිලියන 17,589 ක් ලෙසින් සටහන්ව තිබුණු මධ්‍යම රජයේ සමස්ත ණය ප්‍රමාණය මාස 04 ක් වැනි කාලයක් තුළදී රුපියල් බිලියන 5,720 කින් හෙවත් 32.52 % කින් වැඩිවී තිබීම මෙහි ඇති විශේෂත්වයක්.
ශ්‍රී ලංකාවේ ජනගහනය මිලියන 22 ක් වන අතර ඒ අනුව ශ්‍රී ලංකාවේ සෑම පුරවැසියෙක්ම රුපියල් ලක්ෂ 10ක ණයකරුවෙක් වන බව එම වාර්තා පෙන්වාදෙනවා.
