පල්ලෙකැලේ ජාත්‍යන්තර ක්‍රිකට් ක්‍රීඩාංගණය අසලදී කලහකාරී ලෙස හැසිරුණු පේරාදෙණි විශ්ව විද්‍යාල සිසුන් 03 දෙනෙකු සහ විශ්ව විද්‍යාල සිසුවියක පල්ලේකැලේ පොලීසිය විසින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ ශාස්ත්‍ර පීඨයේ සිව්වන වසරේ සිසුන් පිරිසක් වන වයස අවුරුදු 24 සහ 28 හැවිරිදි වියේ පසුවන අකුරම්බොඩ, කුරුණෑගල, කොස්ලන්ද සහ කැකිරාව යන ප්‍රදේශවල පදිංචිකරුවන් පිරිසක්.
ශ්‍රී ලංකාව සහ ඔස්ටේ්‍රලියා කණ්ඩායම අතර දෙවන එක්දින තරගය නැරඹීම සඳහා පැමිණි ක්‍රීඩා ලෝලීන්ගේ ප්‍රවේශපත් පරීක්ෂා කරන අවස්ථාවේදී බීමත්ව පැමිණි පිරිසක් පොලිස් නිලධාරීන්ට පරුෂ වචනයෙන් බැන තර්ජනය කර ඇති බව පොලීසිය සඳහන් කලා.
එහිදී පොලිස් නිලධාරීන් එම පිරිස පාලනය කිරීමට උත්සාහ කිරීමේදී එම පිරිස අතර සිටි කිහිපදෙනෙකු රාජකාරියේ යෙදී සිටි නිලධාරීන්ට සාපරාධී බලහත්කාරය පෑමක් සිදුකළ බවත් පොලීසිය විසින් පසුව එම සැකකරුවන් 03 දෙනා සහ සැකකාරිය අත්අඩංගුවට ගෙන ඇති බවත් පොලිස් මාධ්‍ය ප්‍රකාශක කාර්යාලය නිකුත් කළ නිවේදනයක සඳහන්.
සැකකරුවන් අද තෙල්දෙණිය මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
