විදේශ ශ්‍රමිකයන් විසින් විදේශ විනිමය හුවමාරු ආයතන හෝ බැංකු හරහා ශ්‍රී ලංකාවට විදේශ මුදල් එවීමේදී දැනට එකී ආයතනවලට ගෙවනු ලබන ගාස්තු (Service charges) නිශ්චිත සීමාවකට යටත්ව ශ්‍රී ලංකා මහ බැංකුව විසින් දැරීමට තීරණය කර තිබෙනවා.
ඒ අනුව, ඉදිරියේදී විදේශයන්හි සේවය කරන ශ්‍රී ලාංකිකයන් විශාල පිරිසකට කිසිම ගාස්තුවකින් තොරව විදේශ මුදල් ශ්‍රී ලංකාවට එවීමට හැකි වන බවයි ශ්‍රී ලංකා මහ බැංකුව නිවේදනය කරන්නේ.
මේ සම්බන්ධයෙන් වන, ආරම්භක දිනය ද ඇතුළු, මෙහෙයුම් උපදෙස් ඉදිරියේදී මහ බැංකුව විසින් නිකුත් කිරීමට නියමිතයි.
මේ අතර විදේශ ශ්‍රමිකයන් එවන මුදල් සඳහා ලබාදෙන දිරිදීමනා යෝජනා ක්‍රමය ලබන ජනවාරි 31 වන දින දක්වා අඛණ්ඩව ගෙවීමට ද ශ්‍රී ලංකා මහ බැංකුව තීරණය කර තිබෙනවා.
ඒ අනුව අමෙරිකානු ඩොලරයක් සඳහා අමතර රුපියල් 10 ක් ලබාදීම තවත් මාසයකට දීර්ඝ වනු ඇති.
ශ්‍රී ලංකා මහ බැංකුව නිවේදනය කළේ විදේශයන්හි සේවයේ නියුතු ශ්‍රී ලාංකිකයින්ගේ ඉල්ලීම් සලකා බලමින් මෙම තීරණය ගත් බවයි.
එම මුදල් බලපත්‍රලාභී බැංකු සහ අනෙකුත් විධිමත් ක්‍රම ඔස්සේ මෙරටට එවීම අනිවාර්ය වනවා.
