පාඨකයන් විසින් සමාජ මාධ්‍ය ඔස්සේ පළකරන ලද අපහාසාත්මක අදහස් දැක්වීම් (Comments) සඳහා අදාළ මාධ්‍ය ආයතන වගකිව යුතු බවට නඩු දැමිය හැකි ප්‍රතිපාදන පවතින බවට ඔස්ටේ‍රලියාවේ ඉහළම අධිකරණය විසින් තීන්දු කර තිබෙනවා.
පාඨකයන් මෙන්ම ප්‍රවෘත්ති නියෝජිත ආයතනද සමාජ මාධ්‍ය වගකීමෙන් හසුරුවාලිය යුතු බව දක්වමිනුයි මෙම තීන්දුව ප්‍රකාශයට පත් කර ඇත්තේ.
තමාට එරෙහි දඩුවම පිළිබඳ ෆේස්බුක් සමාජ මාධ්‍යයේ පළවූ ප්‍රවෘත්තියකට ලද අදහස් දැක්වීම් අභියෝගයට ලක් කර සිර දඩුවමක් විඳි තරුණයෙකු විසින් පවරන ලද නඩු තීන්දුවක් දෙමිනුයි අධිකරණය මේ බව සඳහන් කලේ.
මෙම තරුණයා විසින් ඔස්ටේ්‍රලියාවේ ප්‍රධානතම මාධ්‍ය ආයතන 03 ක් (Sydney Morning Herald – The Australian – Sky News Australia) විත්තිකරුවන් කරමිනුයි මෙම නඩුව පවරා තිබුණේ.
නඩු විභාගයේදී මාධ්‍ය ආයතන විසින් තර්ක කර තිබුණේ පාඨකයන්ගේ අදහස් දැක්වීම් තමන්ගේ මතය යැයි පිළිගත නොහැකි බවයි.
එහෙත් අපහාසාත්මක අදහස් දැක්වීම් ඉවත් කිරීමට මාධ්‍ය ආයතන සදාචාර සම්පන්න විය යුතු බවට අධිකරණය තීන්දු කර තිබෙනවා.
මේ අතර ABC මාධ්‍ය ආයතනය මේ වනවිටත් ෆේස්බුක් අදහස් දැක්වීම් ස්වයංක්‍රීයව අත්හිටුවීමේ ක්‍රියාදාමයක් අත්හදා බලමින් ඇති බවයි වාර්තා සඳහන් කලේ.
