ශ්‍රී ලංකාව තුළ පවතින කොවිඩ් අර්බුදය තවදුරටත් වර්ධනය වුවහොත් එළඹෙන දෙසැම්බර් මාසය වනවිට තුළ සිදුවිය හැකි මරණ සංඛ්‍යාව 12,000 ඉක්මවනු ඇති බව වොෂින්ටන් විශ්වවිද්‍යාලයට අනුබද්ධ සෞඛ්‍ය මිනුම් හා ඇගයීම් පිළිබඳ ආයතනය හෙවත් IHME ආයතනය පවසයි.
පවතින තත්ත්වය යටතේ දැනට ශ්‍රී ලංකාව තුළ දිනකට සිදුවන මරණ සංඛ්‍යාව 100 ඉක්මවන අතර එය තවදුරටත් වර්ධනය වුවහොත් දිනකට මරණ 350ක් දක්වා සිදුවිය හැකි බව එම ආයතනය පෙන්වා දෙයි.
ඒ අනුව දෙසැම්බර් මස 01 වනදා වනවිට තුළ සිදුවිය හැකි මරණ 12,613 ක් බව ඔවුන් පුරෝකථනය කර තිබේ.
කෙසේවෙතත් මෙම තත්ත්වය ඉදිරියටත් පැවතියහොත් එම මරණ සංඛ්‍යාව 22,000 දක්වා ද ඉහළ යා හැකි බව එම ආයතනය සඳහන් කරයි.
Source – https://covid19.healthdata.org/sri-lanka?view=cumulative-deaths&tab=trend
මේ අතර ඊයේ (12) දිනයේදී ශ්‍රී ලංකාවෙන් 3,000කට වැඩි කොරෝනා ආසාදිතයින් සංඛ්‍යාවක් හඳුනාගෙන තිබේ.
ඊයේ වාර්තා වූ ආසාදිතයින් 3,039 දෙනා ද සමග සමස්ත කොවිඩ් ආසාදිතයින් ගණන 345,118 දෙනෙකු දක්වා ඉහළගොස් ඇති බව සෞඛ්‍ය අමාත්‍යංශය සඳහන් කරයි.
ඒ අනුව රෝහල්ගතව ප්‍රතිකාර ලබන සංඛ්‍යාව 37,199 ක්.
පසුගිය 11වැනිදා සිදුවූ කොවිඩ් ආසාදිත මරණ 156ත් සමග වාර්තා වන සමස්ත කොවිඩ් ආසාදිත මරණ සංඛ්‍යාව 5,620ක් දක්වා ඉහළගොස් ඇත.
