දැඩි කථාබහකට ලක්වී ඇති ලාංකික සම්භවයක් සහිත ද්‍රවිඩ ජාතික පවුල හෙට එනම් අගහරුවාදා දිනයේදී රැඳවුම් කඳවුරෙන් නිදහස් කෙරෙනු ඇති බවට වාර්තා පළවනවා.
සංක්‍රමණ අමාත්‍ය Alex Hawke විසින් හෙට කැන්බරා හිදී එය නිල වශයෙන් නිවේදනය කරනු ඇති බවටයි වාර්තා පළවන්නේ.
කෙසේවෙතත් ඔවුන්ට ඔස්ටේ්‍රලියාවේ ස්ථිර පදිංචිය ලැබෙන්නේද නොඑසේනම් වෙනත් වීසා කාණ්ඩයක් යටතේ අයදුම් කිරීමට අවසර හිමිවන්නේද යන්න මෙතෙක් හෙළිවී නැහැ.
දැනට මෙම පවුලේ බාලම දැරිය වන Tharnicaa පර්ත් නුවර රෝහලක ප්‍රතිකාර ලබමින් සිටින අතර ඇයගේ මවද දැරිය සමග සිටිනවා.
වැඩිමහල් දැරිය සහ පියා තවමත් සිටින්නේ ක්‍රිස්මස් දූපතේ රැඳවුම් කඳවුරේයි.
බාලම දැරිය අසාධ්‍ය තත්වයෙන් රෝහල්ගත කිරීමත් සමග මෙම පවුල පිළිබඳ මානව හිමිකම් සංවිධාන දැඩි කථාබහක නිරත වූ අතර ඔවුන් නිදහස් කල යුතු බවටයි මතවාදයක් ගොඩ නැගුණේ.
