තහවුරු වූ රෝගීන් 11,000කට ආසන්න සංඛ්‍යාවක් සමඟ උණ රෝගය පැතිර යාමේ කාල සමය ඉක්මනින් ආරම්භ වී ඇතැයි සෞඛ්‍ය අංශ පවසනවා.
දැනටමත් තහවුරු වූ රෝගීන් දහස් ගණනක් සමඟ නිව් සවුත්වේල්ස් ප්‍රාන්තයේ උණ රෝගය පැතිර යාම ආරම්භ වී ඇති බවයි වාර්තා වන්නේ.
ප්‍රාන්තයේ සෞඛ්‍ය අංශ විසින් මේ වසරේ දැනටමත් ඉන්ෆ්ලුවෙන්සා A සහ B රෝගීන් 10,976ක් තහවුරු කර ඇති අතර පසුගිය වසරේ මෙම කාලය තුල වාර්තා වී තිබුණේ රෝගීන් 6000ක පමණ ප්‍රමාණයක්.
සෞඛ්‍ය විශේෂඥයන් පවසන්නේ සෑම වසරකම උණ රෝගය පැතිර යාම කලින් ආරම්භ වන ප්‍රවණතාවක් මතුවෙමින් පවතින බවයි.
සිඩ්නි විශ්ව විද්‍යාලයේ මහාචාර්ය රොබට් බූයි පැවසුවේ COVID හේතුවෙන් මිනිසුන්ට ස්වභාවික ප්‍රතිශක්තිය නොලැබීම මෙම තත්වයට හේතුව වන්නට ඇති බවයි.
පුරෝකථනය කිරීම අපහසු වුවද, සෞඛ්‍ය විශේෂඥයින් පවසන්නේ මෙම වසරේ උණ පෙර වසරවලට වඩා නරක හෝ ඇතැම් විට දරුණු වනු ඇති බවයි.
උණ රෝගය වෙනුවෙන් එන්නත දැනටමත් ලබා ගත හැකි අතර සෞඛ්‍ය බලධාරීන් උපදෙස් දෙන්නේ ප්‍රමාද නොවී ඉක්මනින් තම එන්නත් මාත්‍රාව ලබා ගන්නා ලෙසටයි.
