හිටපු මුදල් ඇමති බැසිල් රාජපක්ෂ හට ලබන ජනවාරි මස 15 වැනිදා තෙක් විදේශගත වීම සඳහා ශ්‍රේෂ්ඨාධිකරණය අද අවසර ලබා දුන්නා.
වෛද්‍ය ප්‍රතිකාර ලබා ගැනීමට සහ පෞද්ගලික හේතූන් මත ලබන සතියේ ඇමරිකාව බලා යාමට අපේක්ෂා කරන බැවින් ඒ සඳහා අවසර ලබා දෙන ලෙස බැසිල් රාජපක්ෂ වෙනුවෙන් පෙනී සිටි නවීන් මාරපන සහ ගාමිණී මාරපන යන ජනාධිපති නීතිඥවරු කළ ඉල්ලීමක් කර තිබුණා.
අනතුරුව අගවිනිසුරු ජයන්ත ජයසූරිය මහතා ප්‍රමුඛ පංච පුද්ගල විනිසුරු මඩුල්ලක් විසින් මෙම අවසරය ලබා දුන්නා.
වත්මන් ආර්ථික අර්බුදයට වගකිව යුතු පුද්ගලයින්ට එරෙහිව විමර්ශනයක් සිදු කරන්නැයි රජය වෙත නියෝගයක් නිකුත් කරන මෙන් ඉල්ලා ගොනු කර තිබූ පෙත්සම්වල වගඋත්තරකරුවන් වශයෙන් මහින්ද රාජපක්ෂ සහ බැසිල් රාජපක්ෂ ඇතුළු පිරිසක් නම් කර තිබෙනවා.
ඊට අදාලව මහින්ද රාජපක්ෂ සහ බැසිල් රාජපක්ෂ ට අධිකරණයේ අවසරයකින් තොරව විදේශගතවීම වළක්වාළමින් ශ්‍රේෂ්ඨාධිකරණය විසින් පසුගියදා තහනම් නියෝගයක් ද නිකුත් කර තිබුණා.
