මෙල්බන් නගරයේ පොදු ප්‍රවාහනය නංවාලීමේ නව වැඩපිළිවෙලක් වික්ටෝරියා ප්‍රාන්ත හරිත පක්ෂය විසින් ප්‍රකාශයට පත් කර තිබෙනවා.
ඒ අනුව සතියේ දින 07 ම සෑම විනාඩි 10 කටම වරක් දුම්රියක් හෝ ට්‍රෑම් රථයක් ධාවනය වන ආකාරයටයි එම යෝජනාව ඉදිරිපත් කර ඇත්තේ.
කෙසේවෙතත් Cranbourne, Williamstown සහ Upfield මාර්ග මීට අයත්වන්නේ නැහැ.
ලබන නොවැම්බර් මාසයේ පැවැත්වෙන වික්ටෝරියා ප්‍රාන්ත මැතිවරණය ඉලක්ක කරගෙන හරිත පක්ෂය එළිදක්වන ලද ප්‍රවාහන සැළසුම්ටයි මෙම යෝජනාව අන්තර්ගත වන්නේ.
ඉදිරි වසර 04 දී මේ සඳහා ඩොලර් මිලියන 800 ක මුදලක් වැය වනු ඇති බවටයි තක්සේරු කර ඇත්තේ.
දැනට කාර්ය බහුල වේලාවන් ලෙස ප්‍රකාශයට පත් කර ඇති පෙරවරු 09 – පස්වරු 04 වෙනුවට පෙරවරු 07 – රාත්‍රී 07 යන කාලය හඳුන්වාදීමද තවත් යෝජනාවක්.
මේ යටතේ Dandenong, Pakenham, Clifton Hill, Mernda, Hurstbridge, Werribee, Craigieburn, Sunbury, Newport – Glen Waverley ප්‍රදේශවල ජනතාවට වැඩි ප්‍රවාහන පහසුකම් හිමිවනු ඇති බවටයි අනාවැකි පළවන්නේ.
