ඔස්ටේ්‍රලියානුවන් දහස් සංඛ්‍යාත පිරිසකට අවස්ථාව සැලසෙන පරිදි නිවාස මිළ ගණන් අඩු කිරීමට පියවර ගන්නා බව කම්කරු පක්ෂය පවසනවා.
විපක්ෂ නායක ඇන්තනී ඇල්බනීස් විසින් අද පර්ත් හිදී එය නිල වශයෙන් එළි දැක්වීමටද නියමිතයි.
අඩු සහ මැදි ආදායම් ලබන පුද්ගලයන්ට නිවසක් හෝ දේපළක් මිළදී ගැනීම පහසු කිරීම මෙහිදී සිදුවනු ඇතැයි අපේක්ෂිතයි.
වාර්ෂිකව ඩොලර් 90,000 ක උපරිම ආදායමක් ලබන තනි පුද්ගලයෙකු හෝ ඩොලර් 120,000 ක ආදායමක් උපයන යුවළකට අලුතින්ම නිවසක් මිළදී ගැනීමේදී සියයට 40 ක්ද දැනට පවතින නිවසක් මිළයට ගැනීමේදී සියයට 30 ක්ද රජය විසින් දැරීම මේ යටතේ සිදුවනවා.
වසරකට පුද්ගලයන් 10,000 කට පමණ මෙමගින් සෙත සැළසෙනු ඇති බවටයි පුරෝකථනය කර ඇත්තේ.
ලේබර් පක්ෂයේ මැතිවරණ ප්‍රතිපත්ති ප්‍රකාශය අද පර්ත් හිදී එළිදැක්වෙන අතර මෙවර මැතිවරණයේදී බටහිර ඔස්ටේ්‍රලියා ප්‍රාන්තය තීරණාත්මක වනු ඇති බවද සඳහන්.
