පකිස්ථානයේ සියල්කොට් හිදී ශ්‍රී ලාංකිකයෙකු වූ ප්‍රියන්ත කුමාර අමානුෂික අන්දමින් ඝාතනය කිරීමේ සිද්ධිය සම්බන්ධයෙන් පුද්ගලයන් 06 දෙනෙකුට එරට ත්‍රස්ත මර්දන අධිකරණයක් මරණ දඩුවම නියම කර තිබෙනවා.
තවත් 09 දෙනෙකුට ජීවිතාන්ත සිර දඩුවමක් නියමවී ඇති බවයි පකිස්ථාන වාර්තා සඳහන් කලේ.
වසර 02 බැගින් සිර දඩුවම් නියමකර ඇති සැකකරුවන් ගණන 72 ක්.
ඇගලුම් කම්හල් කළමණාකරුවෙකු ලෙස කටයුතු කල ප්‍රියන්ත කුමාර පහරදී ඝාතනය කර පුලුස්සා දමා තිබුණේ පසුගිය වසරේ දෙසැම්බර් 03 වනදායි.
මෙම සිද්ධියට අදාළව පළමුවෙන් එම ඇගලුම් කම්හලේ සේවකයන් 900 කට ආසන්න පිරිසකට චෝදනා ගොණු කර තිබුණා.
අධිකරණයේදී අනාවරණය වූයේ චූදිතයන් හඳුනාගැනීම සඳහා සී සී ටී වී දර්ශන ඇතුලු වීඩියෝ සාක්ෂි බහුලව යොදා ගැණුනු බවයි.
